રાજ્યમાં સરકાર દ્વારા અલગ-અલગ 45 જેટલા નિગમ ચલાવવામાં આવી રહ્યાં છે. જેમાં મોટી સંખ્યામાં કર્મચારીઓ ફરજ બજાવી રહ્યાં છે, પરંતુ સરકારમાં નોકરી કરતા હોવા છતા સચિવાલયના કર્મચારીઓ અને બોર્ડ નિગમના કર્મચારીઓ વચ્ચે ભેદભાવ રાખવામાં આવી રહ્યો છે.
સરકારની તમામ યોજનાઓ પહેલા રાજ્ય સરકારના કર્મચારીઓને ચૂકવવામાં આવે છે. રજૂઆતો કર્યા બાદ બોર્ડ નિગમના કર્મચારીઓને તેનો લાભ આપવામાં આવે છે. હજુ પણ સાતમા પગાર પંચનું એરિયર્સ નિગમના કર્મચારીઓને ચુકવવામાં આવ્યુ નથી.
ગાંધીનગર સર્કિટ હાઉસ ખાતે શુક્રવારે બોર્ડ નિગમ મંડળના હોદ્દેદારોની સ્નેહમિલન યોજાયું હતું. મંડળના પ્રમુખ પ્રવીણ સુતરીયાએ કહ્યું કે, સરકારમાં પહેલા સાતમા પગાર પંચને લઈને રજૂઆતો કરવામાં આવી હતી. હવે તેના એરિયર્સને લઈને રજૂઆતો કરવામાં આવી રહી છે. ત્રણ વર્ષ થવા છતા સરકારમાં તેમની વાત સાંભળવામાં આવતી નથી. સ્નેહમિલનમાં તમામ હોદ્દેદારો દ્વારા સરકાર સામે જો એરીયર્સના આપે તો લડવાની રણનીતિ નક્કી કરવામાં આવી હતી. ફરીથી એક વખત આવેદન અને માસ સી.એલનો કાર્યક્રમ આપવામાં આવશે.