ઉમરગામ તાલુકા વિસ્તારમાં પાણી પુરવઠા વિભાગ અને સિંચાઈ વિભાગ દ્વારા પીવા માટે પાઇપલાઇન માટે તેમજ નહેર મારફતે ખેતીવાડી માટે પાણી પૂરું પાડવામાં આવે છે. પરંતુ છેલ્લા ત્રણ વર્ષથી પાણીની પાઈપલાઈનનું સમારકામ ન થવાને કારણે રોજના હજારો લીટર પાણીનો વ્યય થઈ રહ્યો છે. તેમ છતાં તંત્ર તેનાથી બેખબર છે.
ઉમરગામના ટીંભી ગામમાં આ પાણીના પાઈપલાઈનમાં પડેલા ભંગાણને કારણે જે વાડી માંથી પાઇપલાઇન પસાર કરવામાં આવી છે તે વાડી મલિક બટુકભાઈના જણાવ્યાં મુજબ ત્રણ વર્ષથી આ પાણી આ રીતે વહી રહ્યું છે. પાણી પુરવઠા અને સિંચાઈ વિભાગમાં જાણ કરી છે. પરંતુ તેમ છતાં તેની મરામત કરવામાં આવી નથી. વાડીમાં આંબાના ઝાડ છે. તેના પર દવાનો છંટકાવ કરી શકતો નથી. ચારેબાજુ પાણીના કારણે માટી કાદવમાં રૂપાંતર પામી ચુકી છે.
પાઈપલાઈનમાં ઠેરઠેર પડેલા ભંગાણને કારણે માર્ગ પર અને આસપાસના વાડી વિસ્તારમાં આ પાણી વહી રહ્યું છે. આ રીતે થતા બગાડને તંત્ર વહેલી તકે અટકાવે તે જરૂરી છે. કેમ કે પાણીના આ રીતસરના બગાડને કારણે આગામી દિવસોમાં ઉમરગામ પંથકમાં પણ પાણીનો પોકાર તીવ્ર બનતો હોય છે. ત્યારે, લોકોને અને ખેડૂતોને પૂરતો પાણીનો પુરવઠો મળે તે માટે આ ભંગાર થયેલા પાઈપલાઈનનું સમારકામ કરવું જરૂરી બન્યું છે.