દમણમાં દરિયા કિનારે રોડની કામગીરી બાબતે રાજકારણ ગરમાયું

દમણ: દેવકા બીચ ખાતે પ્રશાસન દ્વારા સી-ફેસ રોડની કામગીરીમાં CRZની પર્યાવરણીય મંજૂરી લેવામાં ન આવતા આ કામગીરી તાત્કાલિક બંધ કરી દેવાની માંગ કરવામાં આવી છે. મુંબઈ હાઇકોર્ટમાં PIL કરવામાં આવી છે. જેને લઈને દમણ પ્રશાસન, ભાજપ અને સ્થાનિક અન્ય પક્ષોમાં ગરમાવો જોવા મળ્યો હતો.

દમણમાં પ્રશાસક પ્રફુલ પટેલ દ્વારા કરોડો રૂપિયાનાં વિકાસનાં પ્રોજેકટ હાથ ધરાયા છે. જેમાં એક પ્રોજેકટ કરોડો રૂપિયાનાં ખર્ચે મુંબઈનાં મરીન સી-ફ્રન્ટ રોડની થીમ પર દેવકા બીચ ખાતે sea-face રોડ અને બ્યુટીફીકેશનનો છે. આ કામગીરી અંગે જીતેન્દ્ર મારુ નામનાં વ્યક્તિએ મુંબઈ હાઇકોર્ટમાં જાહેર હિતની અરજી કરી છે કે,પ્રશાસન દ્વારા આ માર્ગની કામગીરી દરમિયાન CRZ પર્યાવરણીય મંજૂરી લીધી નથી. આ માર્ગ દરિયાઈ ભરતીની નજીક છે. જે આવનારા દિવસોમાં નુકસાનકારક બની શકે છે. માટે આ પ્રોજેકટને અટકાવી દેવામાં આવે.

મુંબઈ હાઇકોર્ટમાં થયેલ આ PIL થી દમણમાં વિરોધનો સુર ઉઠ્યો છે. આ અંગે દમણના સાંસદ અને દમણ ભાજપ પ્રદેશનાં પ્રમુખે એક પત્રકાર પરિષદ બોલાવી હતી. પત્રકાર પરિષદમાં દમણ-દિવનાં સાંસદ લાલુ પટેલે જણાવ્યુ હતું કે, છેલ્લા ત્રણ વર્ષથી દમણનો પ્રવાસન ક્ષેત્રે અનેક ગણો વિકાસ થઇ રહ્યો છે. ત્યારે જે વ્યક્તિને દમણ સાથે સ્નાન સુતકનો પણ સંબંધ નથી તે વ્યક્તિએ આ PIL કરી દમણનાં વિકાસમાં રોડા નાખવાનું કામ કર્યું છે. જેનો અમે વિરોધ કરીએ છીએ અને અમે પ્રશાસન તેમજ પ્રશાસક પ્રફુલ પટેલ સાથે છીએ.દમણ ભાજપ પ્રદેશ અધ્યક્ષ ગોપાલ ટંડેલે જણાવ્યું હતું કે, દમણની જનતા વિકાસ સાથે છે. બહારથી કોઈ આ રીતે પથ્થર ફેંકશે તે દમણ ક્યારેય સાંખી નહીં લે. આ કામગીરી સરકારની છે. અને સરકાર આ કામગીરી અંગે મંજૂરી મેળવી લેશે. જ્યારે pil કરનાર જીતુ મારુ આ પહેલા સેલવાસમાં અનેક ઔદ્યોગિક એકમો સામે PIL કરી ચૂકેલા છે. અને તેનો રેકોર્ડ ખરાબ છે. જેથી પ્રસાશનને કોઈ નુકસાન નહીં થાય. રોડ બનશે અને કાયદેસરની મંજૂરી પણ મળશે.