દાહોદ જિલ્લાના વાતાવરણમાં એકાએક પલટો આવતા વાદળછાયુ વાતાવરણ સર્જાયું હતું અને કમોસમી વરસાદ સાથે કેટલીક જગ્યાએ બરફના કરા પડતા વાતાવરણમાં ઠંડક પ્રસરી જવા પામી હતી. તેમજ કરા પડવાના કારણે ઘઉં અને ચણાના પાકને નુકસાન થતાં ખેડૂતોને પડતા પર પાટું જેવો હાલ થવા પામ્યો છે.
દાહોદ તાલુકાના કતવારા વિસ્તારમાં વરસાદ સાથે કરા પડયા
દાહોદ જિલ્લામાં બપોર પછી એકાએક હવામાનમાં પલટો આવતા જિલ્લાભરમાં વાદળછાયું વાતાવરણ સર્જવાની સાથે વરસાદી માહોલ ઉભો થયો હતો દાહોદ તાલુકાના કતવારા સહિત મધ્યપ્રદેશની સરહદે અડીને આવેલા વિસ્તારોમાં કમોસમી માવઠા સાથે કરા પડ્યા હતા જ્યારે જિલ્લાના અન્ય વિસ્તારોમાં કમોસમી માવઠાને કારણે વરસાદ વરસતા વાતાવરણમાં ઠંડક પ્રસરી જવા પામી છે.
કમોસમી વરસાદના કારણે ખેડૂતોને ભારે નુકસાન
આ કમોસમી માવઠાને કારણે ખેડૂતોનો ખુલ્લામાં પડેલો ખરીફ પાક તેમજ ખેતીવાડી ઉત્પન્ન બજાર માં વેપારીઓનો બનેલો અનાજ પણ પલળી જવા પામ્યું છે જ્યારે વરસાદી કરા પડવાના કારણે ખેતરમાં રહેલ ચણા અને ઘઉંના ખરીફ પાકને પણ નુકસાન થવા પામ્યું છે તેમજ ખેડૂતોના ખળામાં પડેલ તૈયાર અનાજ પલળી જવાના કારણે ભારે નુકસાન થયું છે.