દાહોદમાં લોકડાઉન સમયે શ્રમિકોએ વેતન ચાલુ રાખવા કલેક્ટરને કરી અપીલ

દાહોદમાં લોકડાઉન દરમિયાન શ્રમિકોના દૈનિક વેતન ચાલુ રાખવા કલેક્ટરને અપીલ કરવમાં આવી હતી. આપત્તિના સમયમાં માનવ સહજ સંવેદનના દાખવી શ્રમિકોને વેતન ચાલુ રાખવા કલેક્ટરે કારખાનાદારો તથા નોકરીદાતાઓને અનુરોધ કર્યો છે.

દાહોદઃ કોરોના વાઇરસને પ્રસરતો અટકાવવા માટે સમગ્ર દાહોદ જિલ્લામાં લોકડાઉન લાગુ કરવામાં આવ્યુ છે. તે દરમિયાન દૈનિક વેતન મેળવતા શ્રમિકો કામ પર ન જઇ શકતા હોવાથી તેના પગાર મળતો નથી. જેથી શ્રમિકોઓએ જીવનનિર્વાહ માટે તેમનું વેતન ન કાપવા અંગે કલેક્ટર વિજય ખરાડી સમક્ષ રજૂઆત કરી હતી.

કલેક્ટર વિજય ખરાડીએ કારખાનાદારો તથા નોકરીદાતાઓને શ્રમિકોનો પગાર ન કાપવા અપીલ કરી હતી. કલેક્ટર ખરાડીએ જણાવ્યું કે, કોરોના વાઇરસને પગલે સીઆરપીસીની કલમ ૧૪૪ મુજબ લાગુ કરવામાં આવેલી લોકડાઉનથી દૈનિક વેતનથી કમાતા શ્રમિકોને કોઇ અગવડ ન પડે તે માટે તેમના નોકરીદાતાઓ વેતન આપવાનું ચાલું રાખે તેવી અપીલ કરવામાં આવી છે.

આ બાબતે જિલ્લા વહીવટી તંત્ર દ્વારા જીઆઇડીસી અને અન્ય સ્ટેક હોલ્ડર્સ સાથે જિલ્લા ઉદ્યોગ કેન્દ્રના માધ્યમથી બેઠક કરવામાં આવી હતી. જેમાં કારખાનેદારોને આ બાબતે સમજાવવામાં આવ્યા છે. ઘરકામ માટે આવતી વ્યક્તિને પણ આ દિવસોનું પૂરેપૂરૂ વેતન આપવાની માનવ સહજ સંવેદના દાખવવા કલેક્ટર દ્વારા અપીલ કરવામાં આવી હતી.