દાદરા નગર હવેલીમાં સોશિયલ ડિસ્ટન્સના ધજાગરા ઉડ્યા, વતન જવાની જીદ પર હજારો શ્રમિકો રોડ પર

સંઘપ્રદેશ દાદરા નગર હવેલીમાં ભિલોસા ઈન્ડસ્ટ્રીઝના શ્રમીકોના હોબાળા અને તોડફોડ બાદ સુરંગી ખાતે આવેલા સનાતન ટેક્સટાઇલના કર્મચારીઓએ પણ તોફાન મચાવી વાહનોને નુકસાન પહોંચાડી રસ્તા પર ઉતરી આવ્યાં હતા. જેને કાબૂમાં કરવા પોલીસે લાઠીચાર્જ કર્યો હતો. જો કે શ્રમીકોની એક જ માગ છે કે, અમારે ઘરે જવું છે. અહીં અમારી પાસે કામ નથી.

સેલવાસ : લોકડાઉન અને કોરોના મહામારીમાં સંઘપ્રદેશ દાદરા નગર હવેલીમાં પ્રશાસનની રાહત કામગીરીનો ફુગ્ગો ફૂટી ગયો છે. છેલ્લા 2 દિવસથી સતત હજારો પરપ્રાંતીય કર્મચારીઓ રસ્તા પર ઉતરી આવી સોશિયલ ડિસ્ટન્સના ધજાગરા ઉડાવી તોડફોડ કરી રહ્યા છે. નરોલીના ભિલોસા કંપનીના કર્મચારીઓ બાદ સુરંગી ખાતે આવેલા સનાતન ટેક્સટાઇલ કંપનીના હજારો શ્રમીકોએ બુધવારે રસ્તા પર ઉતરી આવી તોડફોડ કરતા પોલીસે લાઠીચાર્જ કરી ટોળાને વિખેર્યું હતું.

રસ્તા પર પોતાનો આક્રોશ ઠાલવતા ટોળાએ એક જ માગ કરી હતી કે દાદરા નગર હવેલી ગ્રીન ઝોનમાં છે, પરંતુ અહીંની કંપનીઓમાં અમને કામ નથી મળતું, રૂમ ભાડા માટે માલિકો દબાણ કરે છે. રાશનની દુકાનવાળા ઉધારી માગે છે. આવી પરિસ્થિતિમાં જો કામ ન મળે અને પૈસા જ ન હોય તો અહીં રહીને શું ફાયદો માટે કલેકટરને વિનંતી છે કે અમને ગમે તે રીતે અમારા ગામ જવાની મંજૂરી આપવામાં આવે.

દાદરા નગર હવેલીમાં સોશિયસ ડિસ્ટન્સના ધજાગરા ઉડ્યા

ટોળાના આક્રોશને કાબૂમાં કરવા પ્રશાસને પોલીસ કાફલો ખડકી દીધો હતો. જે દરમિયાન ઉશ્કેરાયેલા કર્મચારીઓએ વાહનોમાં તોડફોડ કરતા પોલીસે લાઠીઓ વરસાવી ટોળાને વિખરવાનો પ્રયાસ કર્યો હતો.ઉલ્લેખનીય છે કે, સંઘપ્રદેશ દાદરા નગર હવેલીમાં હજારો પરપ્રાંતીય લોકો કામધંધા માટે સ્થાયી થયા છે. હાલમાં કંપનીઓમાં 50 ટકા સ્ટાફ જ લેવામાં આવતો હોય કોન્ટ્રાકટ પર કામ કરતા હજારો કર્મચારીઓ બેકાર બન્યા છે. ઉપરથી અન્ય ખર્ચ વધી રહ્યો છે. જેને કારણે હવે વતન વાપસીની જીદ પર જાહેરમાં સોશ્યલ ડિસ્ટન્સનો ભંગ કરી તોફાન મચાવી રહ્યા છે.