ગાંધીનગર જિલ્લા સેવા સદન ખાતે આવેલા જન સેવા કેન્દ્રનો આરંભ 16મી ઓકટોબર, 2016ના રોજ કરવામાં આવ્યો હતો. આ જન સેવા કેન્દ્રમાં નિયમિત રીતે અંદાજે 500 થી વધુ અરજદારો પોતાના કામ અર્થ આવતા હોય છે. નાગરિકોના ઘસારાને ધ્યાનમાં રાખીને જિલ્લા કલેકટર એસ.કે. લાંગાએ જન સેવા કેન્દ્રમાં નાગરિકોને પોતાનું કામ ખૂબ જ ઝડપી પૂર્ણ થાય અને અત્યંત આધુનિક સુવિધા મળી રહે તે માટે 15 કાઉન્ટર અરજી મેળવવાથી લઇ કામ પૂર્ણ કરવા સુધી કાર્યરત હતા.
પરંતુ નવીનકરણ થઇ રહેલા જન સેવા કેન્દ્રમાં 23 કાઉન્ટર ઉભા કરવામાં આવનાર છે. તેમજ ફલોરીંગ, વાઇરીંગ સાથે નાગરિકોને જન સેવા કેન્દ્રમાં આરામ દાયક રીતે બેસી શકે તે માટેની ક્ષમતા પણ વધારવામાં આવનાર છે. તેની સાથે સંપૂર્ણ જન સેવા કેન્દ્રમાં નાગરિકોનો ઘસારો વઘે ત્યારે પણ શફોકેશન ન થાય અને ઉનાળાની ગરમીમાં નાગરિકો જન સેવામાં ઠંડકનો અનુભવ કરી શકે તે માટે સંપૂર્ણ સેવા કેન્દ્રમાં એ.સી.ની સુવિધા ઉભી કરવામાં આવશે. તેની સાથે નાગરિકોને કોઇ પણ પ્રકારની ફરિયાદ ન રહે તે માટે ટોકન સુવિધાથી કામ કરવામાં આવશે. ટોકન પણ સ્કીન પર ડિસપ્લે કરવામાં આવશે.
નાગરિકોની સુવિધાને અગ્રમતા આપતાં જિલ્લા સેવા સદન ખાતે આવેલી ઇ-ધરા કેન્દ્ર પણ જન સેવા કેન્દ્રની સાથે સમાવી લેવામાં આવ્યું છે. દરેક પ્રકારની સેવાઓ માટે માહિતી અને માર્ગદર્શન આપતાં બોર્ડ મુકવામાં આવશે. તેની સાથે સરકારની ફલેગશીપ યોજના અને અન્ય જનસુખાકારી યોજનાઓની માહિતી આપતું ઇલેકટ્રોનિક ડિસપ્લે પણ મુકવામાં આવશે. તેની સાથે જન સેવા કેન્દ્રની બાજુમાં ખુલ્લી જગ્યામાં સબ રજીસ્ટ્રાર કચેરીને ખસેડી વધુ કાઉન્ટરો અને અરજદારો માટે આરામ દાયક એસ.સી.ની સુવિધા સાથેની બેઠક વ્યવસ્થા કરવામાં આવશે. ત્યાં પણ ઇલેકટ્રોનિક ટોકન સિસ્ટમ, ઓન લાઇન ટોકન સિસ્ટમનો વ્યાપ વધારવામાં આવશે.
પીવાનું પાણી, ચા-કોફી, આઉટલેટ, વધારાના શૌચાલય સાથે બે ગેઝીબોની પણ વ્યવસ્થા કરવામાં આવનાર છે. તેની સાથે આધારકાર્ડ, ચૂંટણી કાર્ડ, રેશનકાર્ડ, ઇ-સ્ટેમ્પ પેપર અને ફેન્ક્રીંગ મશીનની સુવિધા સબ રજીસ્ટ્રારની ખાલી પડનાર જગ્યાએ કરવામાં આવશે. કલેકટર કચેરીમાં દિવસ દરમ્યાન નાગરિકો મોટી સંખ્યામાં આવતાં હોય છે. તેમના માટે કલેકટર કચેરીના કંપાઉન્ડમાં એ.ટી.એમ. સુવિધા, અમૂલ પાર્લર, કેન્ટીન, વોટર એ.ટી.એમની સુવિધા ઉભી કરવામાં આવશે. તેમજ સંપૂર્ણ સંકુલમાં સુચારું પાર્કિંગ વ્યવસ્થા, અને સી.સી.ટી.વી કવરેજ હેઠળ સંકુલને આવરી લેવામાં આવશે.
