ભાવનગરમાં નવલા નોરતાં સાથે દેશભક્તિનો સોનેરી સંગમ

ભાવનગર: નવલા નોરતાંને લઈને ઘડીયું ગણાઈ રહી છે, ત્યારે ગરબાના તાલે ઝૂમી ઉઠવા યુવાધન ઘેલું બન્યું છે. કલાના પિયર ભાવેણામાં નવધા ભક્તિના મહાપર્વ નોરતામાં માઁ જગદંબાની ઉપાસના સાથે મન મુકીને ગરબે રમવા યુવા હૈયાઓના પગ થરકી રહ્યા છે. ખેલૈયાઓએ સૌંદર્ય રૂપી ટેટુનો શણગાર સજી દેશ ભક્તિનો સુભગ સમન્વય કર્યો છે. તો આવો જાણીએ આ વખતે નવલા નોરતાંમાં કયા કયા ટેટુ ટ્રેન્ડમાં છે. ભાવનગરમાં રહેતી ભાગ્યશ્રી વિસરાણી તથા તેમનું ગૃપ છેલ્લા કેટલાક વર્ષોથી નવરાત્રિમાં અવનવી થીમ દ્વારા પોતાની લાગણીઓ વ્યક્ત કરવાનો ઉમદા પ્રયાસ કરે છે. આ વર્ષે પણ તેઓએ માઁ અંબાની ભક્તિ સાથે દેશપ્રેમને વણી લીધો છે.

યુવતીઓ નવ દિવસ દરમિયાન અંદાજે ૨૫થી ૩૦ હજારનો ખર્ચ કરી છે. ભાવનગરમાં છેલ્લા કેટલાક વર્ષથી પાશ્ચાત્ય સંસ્કૃતિને લોક ભાતીગળ પરંપરા સાથે વણી લઈ મનમોહક માહોલ રચાય છે. જેમાં રાસ ગરબાના સ્ટેપ્સથી લઈને પોતાની જાતને સજવા-ધજવા સુધીની બાબતો સામેલ છે. આજકાલ યુવાનોમાં ટેટુનો જબરદસ્ત ક્રેઝ છે. જેથી ભાગ્યશ્રી અને તેનું ગૃપ શરીર પર ટેટુ બનાવી દેશ ભક્તિને ઉજાગર કરી રહ્યા છે. જેમાં વિનામૂલ્યે મહત્વપૂર્ણ યોગદાન ટેટુ આર્ટિસ્ટ જય બારડ આપી રહ્યા છે.

જય બારડ નવરાત્રી દરમિયાન ખેલૈયાઓ પાસેથી એકપણ પૈસો લીધા વિના વૉટર કલર વડે ટેટુ બનાવી આપે છે. હાલ જમ્મુ-કાશ્મીરમાંથી કલમ ૩૭૦ નાબૂદ થઈ તે વાતને ટેટુ રૂપે વણી લીધી છે. ટ્રાફિક તથા હેલ્મેટ અવરનેસ, અંતરિક્ષ ક્ષેત્રે મિશન ચંદ્રયાન સહિતના ટેટુઓ ચિત્રાવી દેશપ્રેમ તથા પોતાની લાગણીઓ લોકો સમક્ષ પ્રદર્શિત કરી છે. આમ, આ વખતે નવરાત્રીમાં ગરબાના રંગો સાથે ટેટુ વડે દેશભક્તિના રંગો પણ જોવા મળી રહ્યાં છે.