લોકસભાની ચૂંટણીને હવે ગણતરીના દિવસો બાકી છે, ત્યારે ભાવનગર લોકસભા બેઠક પર ભાજપના ઉમેદવાર અને સાંસદ ડો.ભારતીબેન શિયાળે આજે ભાજપના પ્રદેશ અધ્યક્ષ જીતુ વાઘાણી, કેન્દ્રીય મંત્રી અને ભાજપના મહામંત્રી ડોક્ટર મનસુખ માંડવીયા તથા રાજ્ય મંત્રીમંડળની ઉપસ્થિતિમાં પોતાનું ઉમેદવારીપત્ર ભર્યું હતું. ઉમેદવારીપત્ર ભરતા પૂર્વે ભાજપના ઉમેદવાર ડોક્ટર ભારતીબેન શિયાળે જીતનો આશાવાદ વ્યક્ત કર્યો હતો.
ભાવનગર લોકસભા બેઠક પર ભાજપના ઉમેદવાર અને સાંસદ ડો.ભારતીબેન શિયાળ પોતાનું નામાંકન પત્ર રજૂ કરે તે પૂર્વે જ તેમના સમર્થનમાં જંગી જાહેર સભા યોજાઇ હતી. જેમાં ભાજપના પ્રદેશ અધ્યક્ષ જીતુ વાઘાણીએ કોંગ્રેસની સરકાર પર પ્રહાર કરવાની તક છોડી ન હતી અને ભાજપની જીતનો આશાવાદ વ્યક્ત કર્યો હતો. તો કેન્દ્રીય પ્રધાન અને ભાજપના પ્રદેશ મહામંત્રી ડોક્ટર મનસુખ માંડવીયાએ પણ ડોક્ટર ભારતીબેન શિયાળના સમર્થનમાં ભાજપના કાર્યકરોથી લઇ હોદ્દેદારો તમામને એક સાથે જોડાઈને જીતના વિશ્વાસ સાથે આગળ વધવા હાકલ કરી હતી.
જોકે એક તરફ ભાવનગર લોકસભા બેઠક પર ભાજપના ઉમેદવાર પોતાનું નામાંકન પત્ર રજૂ કરી રહ્યા હતા. તો બીજી તરફ તાલાલા વિધાનસભાની પેટાચૂંટણીની થયેલી જાહેરાતને કોંગ્રેસના ધારાસભ્ય ભગા બારડે સુપ્રીમ કોર્ટમાં પડકારતા સુપ્રીમ કોર્ટે ધારાસભ્ય ભગા બારડને રાહત આપતો વચગાળાનો નિર્ણય આપ્યો છે. તેને લઈને પણ ભાજપ બેકફૂટ પર જોવા મળ્યું હતું. જોકે આ અંગે પ્રદેશ અધ્યક્ષે સુપ્રીમ કોર્ટના ચુકાદાને માથા પર ચડાવી કાયદાના ચૂકાદા મુજબ પાલન કરવામાં આવશે તેમ પણ ઉમેર્યુ હતું.
