27 જંતુનાશક દવા પર પ્રતિબંધ તો મૂકાયો પણ આ મુદ્દે ભરૂચના ખેડૂતોનો છે મિશ્ર મત

કૃષિપ્રધાન ભારત માટે ખેત ઉત્પાદન અર્થતંત્રનો મહત્ત્વનો હિસ્સો છે એટલું જ નથી, સવા અબજની વસતી ધરાવતાં દેશની અન્ન નિર્ભરતા જોવી પણ જરૂરી બની રહે છે. દેશમાં હરિત ક્રાંતિ હેઠળ અન્ન ઉત્પાદનમાં આત્મનિર્ભતા મેળવી લેવાઈ છે તેમાં રાસાયણિક ખેતીનો ફાળો નાનોસૂનો નથી. ત્યારે 27 જેટલી પેસ્ટિસાઈડ્સ પર પ્રદૂષક નિંયત્રણના મુદ્દે પ્રતિબંધ મૂકવાની સ્થિતિમાં ભરૂચના ખેડૂતોએ મિશ્ર મત આપ્યાં છે.

ભરૂચઃ કેન્દ્ર સરકારે જોખમી એવી વ્યાપકપણે ઉપયોગમાં લેવાતી 27 જેટલી જંતુનાશક દવા પર પ્રતિબંધ લાદ્યો છે. જેને લઇ ખેડૂતોનો મિશ્ર મત જોવા મળી રહ્યો છે. નર્મદા નદીના કિનારે વસેલા ભરૂચ જિલ્લામાં મોટાપ્રમાણમાં શેરડી, કપાસ અને કેળાનું વાવેતર થાય છે. ભરૂચના વાલિયા, ઝઘડીયા પંથકમાં કેળાનું બમ્પર ઉત્પાદન થાય છે અને આ વિસ્તારને બનાના હબ કહેવામાં આવે છે. તો ભરૂચના આમોદ, જંબુસર અને વાગરા પંથકમાં કપાસનું મોટા પ્રમાણમાં વાવેતર થાય છે. એક સમયે ભરૂચને કોટન કિંગ કહેવાતું હતું. આજની ખેતીની પદ્ધતિમાં જંતુનાશક દવાનો મોટા પ્રમાણમાં ઉપયોગ કરવામાં આવે છે. જો કે કેન્દ્ર સરકારે રોજિંદા વપરાશમાં લેવાતી 27 જેટલી જંતુનાશક દવા પર પ્રતિબંધ મૂકી દીધો છે. જેમાં માનવ તેમ જ પશુઓના જીવન પર જોખમી અસર પેદા કરે તેવી 27 જંતુનાશક દવાઓના ઉપયોગ પર મનાઈ ફરમાવી છે.

આ બાબતે ભરૂચના ખેડૂતોનો મિશ્ર મત જોવા મળી રહ્યો છે. ભરૂચના પ્રગતિશીલ ખેડૂત હસુભાઈ પટેલે ETVBharat સાથેની વાતચીતમાં જણાવ્યું હતું કે સરકારે જંતુનાશક દવા પર પ્રતિબંધ મૂક્યાં બાદ સરકારે બીજી દવા માર્કેટમાં લાવવી જોઈએ, કારણ કે આજની ખેતી પદ્ધતિ એવી છે જેમાં જંતુનાશક દવા વગર ચાલે એમ નથી તો અન્ય એક ખેડૂત આગેવાન અરવિંદસિંહ રણાએ જણાવ્યું હતું કે, સરકારે 27 જંતુનાશક દવા પર નિયંત્રણ મૂક્યું છે, એ મહદઅંશે યોગ્ય છે. પરંતુ આ દવાઓ રોજિંદા વપરાશમાં આવે છે આથી સરકારે બીજી દવા લાવવી જોઈએ. જોકે ખેડૂતોએ છાણીયું ખાતર જ વાપરવું જોઈએ.

27 જંતુનાશક દવા પર પ્રતિબંધ તો મૂકાયો પણ આ મુદ્દે ભરૂચના ખેડૂતોનો છે મિશ્ર મત

ભરૂચમાં જંતુનાશક દવાઓના વિક્રેતા અરુણ ચૌહાણે જણાવ્યું હતું કે સરકારે જે નિર્ણય લીધો છે જે અગાઉ લેવો જોઈતો હતો. આ બધી દવાઓના ઉપયોગના કારણે કેન્સરના પ્રમાણમાં વધારો થયેલો છે અને હવે સરકારે ગંભીરતાપૂર્વક આ દવાનું વેચાણ ન થાય એના પર ધ્યાન આપવું જોઈએ. મોટી કંપનીઓ હજુ પણ આ પ્રોડક્ટ બનાવે જ છે જેના પર સરકારે પગલાં લેવા જોઈએ.

27 જંતુનાશક દવા પર પ્રતિબંધ તો મૂકાયો પણ આ મુદ્દે ભરૂચના ખેડૂતોનો છે મિશ્ર મત

ભરૂચના કૃષિ તજજ્ઞ ડો.નિર્મલ યાદવે સરકારના આ નિર્ણય અંગે ETVBharat સાથેની વાતચીતમાં જણાવ્યું હતું કે જંતુનાશક દવાના પ્રતિબંધથી ખેડૂતોને કોઈ મોટો ફર્ક પડશે નહીં, કારણ કે બજારમાં બીજી અનેક દવાઓ છે જેનો ખેડૂતો ઉપયોગ કરી શકે છે અને સારું ઉત્પાદન પણ મેળવી શકે છે. તો આ રીતે જંતુનાશક દવાઓ પરના પ્રતિબંધને મુદ્દે ભરૂચના ખેડૂતોમાં મિશ્ર મત છે. કેટલાંક ખેડૂતો આ નિર્ણયને આવકારી રહ્યાં છે તો કેટલાક ખેડૂતો ઉપ્તાદન ઘટવાની ચિંતા વ્યક્ત કરી રહ્યાં છે.