પાલનપુર તાલુકાનું સૂંઢાગામ બન્યું CCTV કેમેરાથી સજ્જ, અસામાજિક પ્રવૃત્તિમાં થશે ઘટાડો

બનાસકાંઠા જિલ્લાના પાલનપુર તાલુકાના સુંઢા ગામમાં છેલ્લા ઘણા સમયથી અસામાજીક પ્રવૃત્તિઓની ઘટનાઓમાં વધારો થઈ રહ્યો હતો. જેને લઇ હાલમાં ગ્રામ પંચાયત દ્વારા તમામ ગામને CCTVથી સજ્જ કરી દેવામાં આવ્યું છે. જેના કારણે અત્યાર સુધી એક પણ અસામાજિક પ્રવૃત્તિની ફરિયાદ નોંધાઈ નથી.

• બનાસકાંઠા જિલ્લાના ગ્રામીણ વિસ્તારોમાં ચોરીઓની ઘટનાઓમાં વધારો
• પાલનપુર તાલુકાનું સૂંઢાગામ CCTVથી સજ્જ
• CCTV કેમેરા લાગવતા ગામ લોકોમાં શાંતિનો માહોલ

બનાસકાંઠા: બનાસકાંઠા જિલ્લાને પછાત જિલ્લો માનવામાં આવે છે. જેના કારણે છેલ્લા ઘણા સમયથી બનાસકાંઠા જિલ્લામાં ચોરી અને લૂંટની ઘટનાઓમાં વધારો જોવા મળી રહ્યો હતો. ખાસ કરીને બનાસકાંઠા જિલ્લામાં છેલ્લા બે વર્ષમાં શહેરી વિસ્તારોને છોડી ગ્રામીણ વિસ્તારોમાં પણ મોટી મોટી ચોરીની ઘટનાઓ સામે આવી રહી હતી. આમતો ચોરીની ઘટનાઓ મહદંશે શહેરી વિસ્તારોમાં જોવા મળતી હોય છે અને ગ્રામીણ વિસ્તારમાં મોટા ભાગે ખેડૂતો વસવાટ કરતા હોય છે પરંતુ હવે ચોરો ખેડૂતોને પણ નિશાન બનાવી મોટી ચોરીઓની ઘટનાઓને અંજામ આપી રહ્યા છે.

પાલનપુર તાલુકાનું સૂંઢાગામ CCTVથી સજ્જ
પાલનપુર તાલુકાના આદર્શ ગામ તરીકે ગણાતા સુંઢા ગામ હવે સુરક્ષાની રીતે આધુનિક સુવિધાઓથી સજ્જ બન્યું છે. ગામમાં બનતી તમામ ઘટનાઓને કેમેરામાં કેદ કરવા પંચાયત દ્વારા ગામમાં ઠેર ઠેર CCTV કેમેરા લગાવાય છે. તો ગ્રામજનોને કોઈ આપત્તિને સમયે કે સરકારની અવનવી યોજનાઓથી વાકેફ કરવા ગામમાં ઠેર-ઠેર લાઉડ સ્પીકર લગાવાયા છે.જેને લઈ ગ્રામજનોને ઘરે બેઠા જ તમામ જાણકારી મળી જાય છે. તોCCTV લાગી જતા ગ્રામજનો સુરક્ષાની દ્રષ્ટિએ ચિંતા મુક્ત બન્યા છે.પાલનપુર તાલુકાના છેવાડે આવેલું અને અંદાજે 2800ની વસ્તી ધરાવતું તાલુકાનું સૂંઢાગામ પ્રાથમિક જરૂરિયાતોમાતો પહલેથી જ હતું પરંતુ, હવે આ ગામ સુરક્ષાની દ્રષ્ટિએ આધુનિક ઉપકરણોથી સજ્જ બન્યું છે.

મહિલા સરપંચે ડિજિટલ ભારત તરફ આગળ પગલુ ભર્યું

સમગ્ર ગામનું સુકાન ગામના મહિલા સરપંચ કમુબેન પટેલ સંભાળી રહ્યા છે. ત્યારે મહિલા સરપંચે ડિજિટલ ભારતની પ્રેરણાને ધ્યાને લઈ ગામમાં કોઈ અનિચ્છનીય ઘટના ન બને અને ઘટના બને તો સમગ્ર ઘટના કેમેરામાં કેદ થાય તેને લઈ ગ્રામ પંચાયત દ્વારા ગામમાં આવેલા મુખ્ય માર્ગો અને જાહેર સ્થળોએ 16 જેટલા CCTV કેમેરા લગાવી ગામને CCTVમાં કેદ કરી દીધું છે.જેને લઈ ગામમાં અસામાજિક પ્રવૃત્તિઓ બંધ થઇ છે.સાથે સાથે ગ્રામજનોને કોઇ આપત્તિના સમયે કે સરકારની કોઇ યોજનાથી વાકેફ કરવા પંચાયતના સ્ટાફને ડોર ટુ ડોર ફરવું ન પડે અને સમય બચે તેને લઈ ગામમાં ઠેર ઠેર મુખ્ય જગ્યાઓ પર લાઉડ સ્પીકર લગાવી સમગ્ર ગામને લાઉડ સ્પીકરથી પણ સજ્જ કરી દીધું છે.

કંટ્રોલ રૂમમાં મોનિટરિંગ કરવામાં આવી રહ્યુ છે

આ આધુનિક ઉપકરણોનું સંચાલન કરવા ગ્રામ પંચાયતના એક રૂમને જ કંટ્રોલ રૂમ બનાવાયો છે. જેમાં 24 કલાક CCTV કેમેરાનું રેકોર્ડિંગ થાય છે. તો પંચાયતનો એક કર્મી દ્વારા સતત એલઈડી સ્ક્રિન દ્વારા કેમેરામાં કેદ થતા દ્રશ્યોને આધારે મોનિટરિંગ કરવામાં આવી રહ્યુ છે.

ગામની સુરક્ષિતને ધ્યાનમાં રાખી CCTV કેમેરા લગાવાયા

પાલનપુર તાલુકાના સુંઢા ગામમાં પ્રાથમિક સુવિધાઓથી વધીને સુરક્ષાના આધુનિક ઉપકરણો પૂરા પડાતા ગ્રામજનો સુરક્ષાની દૃષ્ટિએ ભયમુક્ત જીવન જીવતા થતા ગ્રામજનો પંચાયતની કામગીરીને બિરદાવી રહ્યા છે અને ગામના લોકો હવે CCTV કેમેરા લાગતા પોતાને પણ સુરક્ષિત મહેસુસ કરી રહ્યા છે.પાલનપુરના સૂંઢાગામની ગ્રામપંચાયતે 14માં નાણાંપંચની ગ્રાન્ટમાંથી ગામની સુરક્ષાને ધ્યાનમાં રાખીને CCTV કેમેરા લગાવીને ગામની સુરક્ષાને મજબૂત બનાવી છે. જેને લઈને અન્ય ગામો દ્વારા પણ તેમના ગામમાં CCTV કેમેરા લગાવીને ગામની નિરાંતે બેખોફ રહીને પહેરેદારી કરાવે તે ખુબજ જરૂરી છે.