બનાસકાંઠા: જિલ્લા LCB પોલીસે આંતરરાજ્ય ઘરફોડ અને વાહન ચોરીને અંજામ આપતી ગેંગની ધરપકડ કરી છે. આ સાથે જ પોલીસે 4 બુલેટ અને 2 લક્ઝુરિયસ કાર સહિત 11 ચોરીના ગુનાઓને અંજામ આપનારા 7 રીઢા ચોરને ઝડપી વધુ તપાસ હાથ ધરી છે.
મળતી માહિતી મુજબ, બનાસકાંઠા જિલ્લા LCB પોલીસ 2 દિવસ અગાઉ વિવિધ ચોરીઓના ગુનાઓને અટકાવવા માટે પેટ્રોલિંગમાં હતી. આ સમયે પાલનપુર ધનીયાણા ચાર રસ્તા પાસે સફેદ કલરની ટોયટો ગાડી અને ચાર બુલેટ સાથે ઉભેલા કેટલાક શખ્સો શંકાસ્પદ જણાતા પોલીસે તેમની પૂછપરછ કરી હતી. જેમાં આ શખ્સોએ કાર અને બુલેટ ચોરી કરીને લાવ્યા હોવાનું કબૂલ્યું હતું. જેથી પોલીસે આ સાતેય રાજસ્થાની શખ્સોની અટકાયત કરી તપાસ શરૂ કરી હતી. જેમાં આ ગેંગે પાલનપુર શહેર ઉપરાંત ભરૂચ, અંકલેશ્વર, નવસારી તેમજ રાજસ્થાનમાં પણ વિવિધ સ્થળોએ ચોરી કરી હોવાની કબૂલાત કરી હતી.
લક્ઝુરિયસ કાર અને બુલેટની ચોરી કરવામાં આ ગેંગ માહિર છે. આ ઉપરાંત કરિયાણાની દુકાન, બેન્ક અને જૈન મંદિરમાં પણ ચોરી કરી હોવાનું કબૂલ્યું હતું. આમ બનાસકાંઠા LCB પોલીસે આ 7 રીઢા ચોરને 4 બુલેટ અને 2 કાર સહિત 6.18 લાખના મુદ્દામાલ સાથે ઝડપી વધુ તપાસ હાથ ધરી છે.