સમાજમાં સમાનતા લાવવાના હેતુથી બનાસકાંઠામાં યોજાયો સમૂહલગ્ન સમારોહ

બનાસકાંઠાઃ દરેક સમાજમાં એકતા જળવાઈ રહે તે માટે ઠેર-ઠેર સમૂહ લગ્નનું આયોજન કરવામાં આવયું હોય છે. ત્યારે રવિવારના રોજ ડીસા ખાતે ઠાકોર સમાજ દ્વારા 45 યુગલો માટે સમૂહલગ્નનો સમારોહ યોજાયો હતો.

આજના યુગમાં લોકો પોતાના ઘરે લગ્ન પ્રસંગે મોટા-મોટા ખર્ચા કરતા હોય છે, ત્યારે દરેક સમાજ પોતાનામાં એકતા જળવાઈ રહે અને લોકો મોટા ખર્ચાથી બચી શકે તે માટે ઠેર-ઠેર સમૂહ લગ્નના આયોજન કરવામાં આવતા હોય છે. તેવી જ રીતે ડીસાના ખેતીવાડી ઉત્પન્ન બજાર માર્કેટ યાર્ડ ખાતે ઠાકોર સમાજનો 5મો સમૂહ લગ્ન સમારોહ યોજાયો હતો. બનાસકાંઠા જિલ્લામાં 3.5 લાખથી પણ વધુ ઠાકોર સમાજ વસે છે, ત્યારે આ સમૂહ લગ્નનો મુખ્ય હેતુ સમાજમાં એકતા જળવાઈ રહે અને લોકો વ્યસનોથી દૂર રહે તે હતો.

આ સમૂહ લગ્નમાં 45 જેટલા યુગલોએ પ્રભુતામાં પગલાં માંડ્યા હતા. બનાસકાંઠા જિલ્લામાં વિવિધ ક્ષેત્રે નામના ધરાવતા તમામ લોકો તેમજ ઠાકોર સમાજના લોકોએ આ 45 નવયુગલોને આશીર્વાદ પણ પાઠવ્યા હતા અને વર-કન્યાના પરિવારો દહેજના મોટા ખર્ચાથી બચી શકે તે માટે ઠાકોર સમાજના લોકો દ્વારા લગ્નનો તમામ સામાન પણ પૂરો પાડવામાં આવ્યો હતો.