અરવલ્લીમાં આદિવાસી સમાજના પ્રખ્યાત ગેરના મેળાનું આયોજન

અરવલ્લી: જિલ્લાના ભિલોડામાં આદિવાસી સમાજમાં અન્ય તહેવારો કરતા હોળીના તહેવારને વધુ મહત્વ આપવામાં આવે છે. ભીલોડા તાલુકાના ડુંગરી ગરાસિયા આદિવાસી સમાજ દ્વારા પરંપરાગત હોળી પછી ગેર મેળાનું આયોજન કરવામાં આવતું હોય છે.

ભિલોડા આર્ટ્સ ઍન્ડ કૉમર્સ કૉલેજમાં આદિવાસી ભાઈ-બહેનો ગેર મેળામાં ઉમટ્યા હતા. આઘેર મેળામાં અસંખ્ય ઢોલ અને સ્ત્રીઓ દ્વારા કરવામાં આવેલા લેઝીમ નૃત્ય પણ એક ખાસ આકર્ષણનું કેન્દ્ર બન્યુ હતું.

આ ગેર મેળામાં આદિવાસી લોકો હોળીના તહેવાર નિમિત્તે ગેરીયા બને છે. લોકો પાસેથી પૈસાનું ઉઘરાણું કરે છે. ઢોલના તાલ સાથે નાચગાન કરતાં આ લોકો મેળામાં આવે છે. આ સાથે જ લોકો પાસેથી ઊઘરાવેલા ગેરના પૈસાથી વર્ષ દરમિયાન નોકરી મેળવવા, ખેતીમાં સારી ઉપજ માટે, બીમાર વ્યકિ્તની સારવાર માટે અથવા કે કોઈ સમસ્યાના નિવારણ જેવી બાબતે લીધેલી માનતા પૂરી કરે છે.