અમરેલીના લાઠીમાં પશુઓને ઘાસચારો ન મળતા માલધારીઓનો હલ્લાબોલ

અમરેલીઃ લાઠી તાલુકામાં મોટી સંખ્યામાં માલધારીઓ પોતાના પશુધન સાથે વસે છે. અહીં છેલ્લા કેટલાય સમયથી પશુઓને ઘાસચારો મળતો નથી, તેના કારણે રોષે ભરાયેલા માલધારીઓએ આજે પશુઓ સાથે પ્રાંત કચેરીનો ઘેરાવ કર્યો હતો.

અમરેલી જિલ્લાના લાઠી તાલુકાને રાજ્ય સરકારે અસરગ્રસ્ત જાહેર કર્યો છે, પરંતુ અસરગ્રસ્ત જાહેર કરાયેલા તાલુકાને મળવી જોઈતી પૂરતી સુવિધાઓ અહીં પહોંચી નથી. લાઠી તાલુકામાં મોટી સંખ્યામાં માલધારીઓ વસે છે. જેઓ પાસે બહોળી સંખ્યામાં પશુધન છે અને આ પશુઓ ઉપર જ તેમના જીવનનો ગુજારો થતો હોય છે. તેવા કિસ્સામાં લાઠી તાલુકામાં ઘાસચારાનું દુર-દુર સુધી દેખાતો નથી. દુર-દુર સુધી પશુઓ માટે ઘાસચારાની કોઈ વ્યવસ્થા નથી. જેના કારણે માલધારીઓએ સરકાર સમક્ષ અનેક વખત આ સમસ્યાના નિવારણ અર્થે ન્યાયની ગુહાર લગાવી હતી. છતાં તેમને તંત્ર તરફ યોગ્ય પ્રત્યુત્તર મળતો ન હતો.

આજે આ સમસ્યાથી રોષે ભરાયેલા માલધારીઓ પોતાના પશુઓને લઈ પ્રાંત કચેરી ખાતે પહોંચી ગયા હતા. જ્યાં પશુઓને સાથે રાખીને કચેરીનો ઘેરાવ કરવાનો પ્રયત્ન કર્યો હતો. આ બાદ તેઓએ પશુઓને કચેરીની અંદર ઘુસેડી કચેરીના દરવાજા બંધ કરવાનો પણ પ્રયત્ન કર્યો હતો.

અમરેલીના લાઠીમાં માલધારીઓનો પ્રાંત કચેરી ખાતે અનોખો વિરોધ, પશુધન સાથે કચેરીનો ઘેરાવ કર્યો.

આ ઘટનાથી તંત્રમાં અફરાતફરીનો માહોલ સર્જાયો હતો. જેથી વહીવટી તંત્ર અને પોલીસ તંત્ર માલધારીઓને સમજાવવાના પ્રયત્નોમાં લાગી ગયું હતું. માલધારીઓનું આવેદન સ્વીકારીને પશુઓને 10 દિવસમાં ઘાસચારો પૂરો પાડવાનું આશ્વાસન આપવામાં આવ્યું હતું, પરંતુ અછતગ્રસ્ત જાહેર થયેલા તાલુકાને વહેલીતકે ન્યાય મળે તે હેતુથી માલધારીઓ પ્રાંત કચેરીની બહાર ધરણાં ઉપર બેસી ગયા હતા. અંતે એક કલાકની સમજાવટ બાદ કોંગ્રેસના જિલ્લા પંચાયત સભ્ય મયુર આસોદરિયાની આગેવાનીમાં પોતાના પશુઓને લઈને પરત ફર્યા હતા.