20 જુલાઈએ કૌશલ ભટ્ટ અને જીગર સોલંકી નામના બંને કોન્સ્ટેબલ સ્યુસાઇડ નોટ લખીને ગુમ થઈ ગયા હતા. જેમાં બંને જણાએ PI, ACP અને અન્ય પોલીસકર્મીઓ સામે આક્ષેપ કર્યા હતા. આ દરમિયાન જ એક અરજદારે બંને વિરુદ્ધ 2 લાખનો તોડ કર્યાની અરજી કરી હતી. આ અંગે પોલીસે બંને કોન્સ્ટેબલ વિરુદ્ધ ફરિયાદ પણ નોંધી હતી.
નવરંગપુરાના બંને કોન્સ્ટેબલની પોલીસે કરી ધરપકડ બંને કોન્સ્ટેબલ ગુમ થયા બાદ પોલીસે સ્યુસાઇડ નોટ અને કોન્સ્ટેબલ વિરુદ્ધ થયેલી ફરિયાદના અનુસંધાનમાં તપાસ હાથ ધરી હતી. જેમાંથી કૌશલ ભટ્ટ 2 દિવસ અગાઉ જ પોલીસ સામે હાજર થઈ ગયો હતો, જ્યારે જીગર સોલંકી સોમવારના રોજ પોતાના વકીલ સાથે હાજર થયો હતો. જીગરની પોલીસે ધરપકડ કરી પૂછપરછ શરૂ કરી હતી. જેમાં જીગરે જણાવ્યું હતું કે, ભાગ્યા પછી બસમાં બેસીને ફરાર થયો હતો. જંગલમાં રોકાઈને ભટકતા હોવાની કહાની કોન્સ્ટેબલોએ ઉભી કરી હતી. બંનેએ અલગ-અલગ જગ્યાએ સ્યુસાઇડ નોટ લખી હોવાનું પણ પોલીસને જણાવ્યું હતું. પોલીસે બંને કોન્સ્ટેબલે કરેલી અરજી અંગે પણ તપાસ શરૂ કરી છે. બંને કોન્સ્ટેબલ પોતે તોડ કરેલી વાતને સ્વીકારતા નથી. જ્યારે પોલીસ પાસે બંને કોન્સ્ટેબલના CCTV ફૂટેજ પણ છે. પોલીસ હવે આગળની તપાસ કોલ ડિટેલ્સ અને અન્ય પુરાવાના આધારે હાથ ધરશે. પોલીસ જીગરને કોર્ટમાં હાજર કરી આગળની કાર્યવાહી હાથ ધરી છે.
