અસહ્ય ગરમીમાં અબોલ પશુ-પક્ષીઓને રાહત માટે ફક્ત આટલું કરો....

અમદાવાદઃ સમગ્ર રાજ્યમાં ગરમીનો પ્રકોપ યથાવત છે. સતત વધી રહેલી ગરમીને કારણે હવામાન વિભાગ દ્વારા હિટવેવની આગાહી અને ઓરેન્જ એલર્ટ જાહેર કરવામાં આવ્યું હતું. માનવીઓ ગરમીથી બચવા માટે અનેક નુસખાઓ અપનાવે છે. અબોલ પશુ પક્ષીઓ પાસે માનવ જેટલા વિકલ્પ હોતા નથી. નાની મોટી કાળજી લઇ આ અબોલ પશુ-પક્ષીઓને અસહ્ય ગરમીથી આપણે બચાવી શકીએ છીએ ત્યારે જાણીએ વિગત વાર..

અસહ્ય ગરમીને કારણે સમગ્ર શહેરમાં જ્યાં લોકો ત્રાહિમામ પોકારી રહ્યા છે અને બપોરના સમયમાં સદંતર જ્યારે રસ્તાઓ સુમસાન પડ્યા છે, ત્યારે બહાર રખડતા પશુઓ અને આકાશમાં વિહરતા પક્ષીઓ પણ ગરમીને કારણે હેરાન થાય છે. જેના કારણે અનેક બીમારીઓ અને ઘણીવાર મૃત્યુના કિસ્સાઓ પણ સામે આવે છે.

જો ઘરમાં કોઈ પક્ષી કે પ્રાણી પાડ્યું હોય તો તેને બેસવા માટે યોગ્ય જગ્યા અને ગરમીથી રાહત મળે તે માટે શક્ય હોય તો પંખા અથવા કુલરની વ્યવસ્થા કરવી અને પીવા માટે નોર્મલ ઠંડુ પાણી અને જરૂરત જણાય તો તબિયતની યોગ્ય તપાસ ડોક્ટર પાસે કરાવી જોઇએ. અસહ્ય ગરમીના કારણે પશુઓ અને પક્ષીઓની કઈ રીતે કાળજી લેવી જોઈએ તે અંગે જીવ દયા ફાઉન્ડેશનના ડૉ.અપૂર્વ ગોહિલે સાથે ખાસ વાતચીત કરતા તેમણે જણાવ્યું હતું કે, આ અબોલ પશુ પક્ષીઓ પણ આ સંસારમાં જીવે છે અને તેમને જીવવાનો પૂરો હક છે. માણસો પાસે બુદ્ધિક્ષમતા વધુ છે. જેના કારણે તેઓ આ બોલ પશુઓની મદદ કરી શકે છે અને નાની મોટી કાળજીઓ લઈને તેમને આ અસહ્ય ગરમીથી બચાવી શકે છે.જેથી ઘરની આસપાસ પશુપક્ષીઓ દેખાય તો તેમને છાંયડામાં બેસવા દેવું, જેથી થોડીવાર માટે તેને ગરમીથી રાહત મળે, પીવા માટે ઠંડું પાણી આપવું પરંતુ પિત્તળ અથવા પ્લાસ્ટિકના વાસણમાં ન આપવું, ઓઆરએસનું પાણી શક્ય હોય તો આપવું અને જો કોઈ પશુ કે પછી વધારે ખરાબ હાલતમાં જણાય તો તુરંત નજદીકના હેલ્થ સેન્ટરમાં કોન્ટેક કરી તમને બચાવવાનો પ્રયત્ન કરવો જોઈએ.