અમદાવાદમાં અઢી વર્ષની બાળકી સાથે દુષ્કર્મ, શકમંદ CCTV કેમેરામાં થયા કેદ

અમદાવાદ : નાના બાળકો પર દુષ્કર્મના બનાવો સતત વધી રહ્યા છે. ત્યારે વધુ એક કિસ્સો પ્રકાશમાં આવ્યો છે. જેમાં શ્રમિક પરિવારની અઢી વર્ષની બાળકી ઘર પાસે રમી રહી હતી ત્યારે અજાણ્યા ઇસમેં બાળકીનું અપહરણ કરીને દુષ્કર્મ આચર્યું હતું. જેમાં 14 કલાક બાદ બાળકી ગુમ થયેલી જગ્યાએથી જ પરત મળી આવી હતી. આ મામલે પોલીસે ગુનો નોધી તપાસ શરૂ કરી છે. જેમાં CCTV ફૂટેજમાં શકમંદ ઇસમ પણ કેદ થયો છે.

શહેરના એક વિસ્તારમાં આવેલી ખુલ્લી જગ્યામાં શ્રમિક પરિવાર છાપરા બાંધીને રહે છે. ત્રણ દિવસ પહેલા આ પરિવારની બાળકી ઘર બહારથી ગુમ થઈ હતી. જેને પગલે તેના પરિવારજનોએ આસપાસમાં શોધખોળ કરી પણ બાળકી મળી નહોતી.

આ મામલે સરખેજ પોલીસે CCTV તેમજ અલગ અલગ જગ્યાએ બાળકીની શોધખોળ હાથ ધરી હતી. આ દરમિયાન બીજા દિવસે વહેલી સવારે 5 વાગ્યે ઘર નજીક આવેલા ત્રણ રસ્તા પાસેથી બાળકી રડતી હાલતમાં મળી આવી હતી. ત્યારે બાળકી 14 કલાક સુધી ગુમ રહી અને તે બાદ પરિવારને મળી હતી.

બાળકી મળી ગયા બાદ પોલીસે તપાસ કરતા તેની સાથે કોઈ ઘટના બની હોવાની શંકા ગઈ હતી. જેથી પોલીસે બાળકીની મેડિકલ તપાસ કરાવતા બાળકી સાથે દુષ્કર્મ થયું હોવાનો ખુલાસો થયો હતો. જેથી બાળકીને તાત્કાલિક સારવાર અર્થે હોસ્પિટલમાં લઈ જવામાં આવી હતી.

હાલ આ મામલે સરખેજ પોલીસ અને અમદાવાદ ક્રાઈમ બ્રાન્ચે તપાસ હાથ ધરી છે. જેમાં શકમંદ ઇસમના CCTV ફૂટેજ પણ મળી આવ્યા છે. જેની પોલીસ શોધખોળ કરી રહી છે.