ક્લોરોક્વીન અને એઝીથ્રોમાયસીન દવાથી કોરોનાનું જોખમ ઓછું થતું નથી: ડૉ. અતુલ કે. પટેલ

કોરોના વાયરસને કાબૂમાં લેવા માટે હજી સુધી કોઈ દવા કે રસી શોધી શકાઈ નથી. આ સંજોગોમાં ક્લોરોક્વીન અને એઝીથ્રોમાયસીન દવા લેવાથી કોરોના થતો નથી, તેવી એક અફવા જનતામાં ફરી રહી છે. આ ખરેખર અફવા જ છે.

અમદાવાદ: ગુજરાતમાં હાલ કોરોનાનો કેર છે. કોરોના વાયરસને કાબુમાં લેવા માટે હજી સુધી કોઈ દવા કે રસી શોધી શકાઈ નથી. આ સંજોગોમાં ક્લોરોક્વીન અને એઝીથ્રોમાયસીન દવા લેવાથી કોરોના થતો નથી, તેવી એક અફવા જનતામાં ફરી રહી છે. આ ખરેખર અફવા જ છે. તે દવા લેવાથી કોરોના નહીં થાય તેવી વાત ખોટી છે. આવો જોઈએ નિષ્ણાત ડૉકટર શું કહી રહ્યાં છે.

ચેપી રોગોના નિષ્ણાત ડોક્ટર ડૉ. અતુલ કે. પટેલે જણાવ્યું હતું કે, આપણી પાસે અત્યારે કોરોનાને અટકાવી શકાય એવી અકસીર કોઈ દવા નથી. હાઈડ્રોક્સીક્લોરોક્વીન અને એઝીથ્રોમાયસીન આ જે બે દવાઓની ભલામણ કરવામાં આવી છે એ દવાઓ જે ડોક્ટરો કોરોનાના દર્દીઓની સારવાર કરે છે અથવા તો કોરોનાના દર્દીઓના સંસર્ગમાં આવે છે તે લોકો આ દવા લઈ શકે છે.કોરોના માટે જે વ્યક્તિઓ હાઈ રિસ્ક છે એવા લોકો એવું માને છે કે, આ દવા લેવાથી કોરોના નહીં થાય તો એ વાત ખોટી છે. આ દવા સીમિત વર્ગ માટે માત્ર છે. એટલું જ નહીં આ દવાની આડઅસર પણ થાય છે.

ડૉકટર અતુલ પટેલે એમ પણ કહ્યું હતું કે, વારંવાર હાથ ધોવા એ પાયાની જરૂરિયાત છે. અને જેમને ખાંસી કે શરદી હોય એમણે અચૂક ફેસ માસ્ક પહેરવા જોઈએ. જેથી તેમનો ચેપ ફેલાય નહી.