ધોળકામાં કોંગ્રેસ દ્વારા રેમડેસિવિર ઇન્જેક્શન માટે પ્રાંત અધિકારીને આપ્યું આવેદન પત્ર

ધોળકામાં દિનપ્રતિદિન કોરોના પોઝિટિવના કેસો વધી રહ્યા છે, ત્યારે ધોળકામાં સામુહિક આરોગ્ય કેન્દ્ર, શરણમ હોસ્પિટલ, દુર્ગેશ હોસ્પિટલ તેમજ DIMH મળી કુલ 48 બેડની સુવિધા આપવામાં આવી છે, ત્યારે આવા દર્દીઓને સારવાર દરમિયાન રેમડેસિવિર ઇન્જેક્શન ઉપલબ્ધ કરાવવા કોંગ્રેસ દ્વારા પ્રાંત અધિકારીને આવેદનપત્ર આપવામાં આવ્યું હતું.

• ધોળકામાં દસથી બાર દિવસ દરમિયાન 25 કોરોના દર્દીના મૃત્યુ
• ધોળકામાં કોરોના સંક્રમિતનો ગ્રાફ સતત વધી રહ્યો છે
• કોરોના દર્દીઓને રેમડેસિવિર ઇન્જેક્શન મળી રહે તે માટે કોંગ્રેસે ડે. કલેક્ટર ને આવેદનપત્ર આપ્યું

અમદાવાદ : જિલ્લાના ધોળકા તાલુકામાં કોરોના પોઝિટિવની સંખ્યા દિનપ્રતિદિન વધી રહી છે, ત્યારે ધોળકામાં 48 બેડની સુવિધા આપવામાં આવી છે. કોરોના અંગે લોકો હજુ નિષ્કાળજી દાખવી રહ્યા છે. ધોળકા ટાઉન પોલીસે પણ સમગ્ર નગરમાં સરકારની ગાઈડ લાઈન પ્રમાણે સામાજિક, ધાર્મિક, રાજકીય મેળાવડા પર પ્રતિબંધ અંગે તેમજ પવિત્ર રમજાન માસમાં લોકોએ નમાજ અદા કરવા ભેગા નહીં થાય અને મૌલાના એકલા જ મસ્જિદમાં નમાજ અદા કરે તેમજ સૌ કોઈના ઘરે નમાજ અદા કરવા માઇક દ્વારા એનાઉન્સ કરવામાં આવે છે.

લોકો કોરોના ગાઈડલાઈનનુ પાલન કરે

ઘરે નગરજનોએ સોશિયલ અંતર જાળવવું અને માસ્ક ફરજીયાત પહેરવું તેમજ કારણ વિના બહાર ન નીકળવા કડક સૂચના આપવામાં આવે છે. આમ વધતા જતા કેસોને ધ્યાને લઇ કોંગ્રેસના શહેર પ્રમુખ ફારૂક ખાન પઠાણ, મન્સૂર ખાન, હરીશ ભાઈ પરમાર તેમજ દિનેશભાઈ સહિતનાઓએ કોરોનાના દર્દીઓને રેમડેસિવિર ઇન્જેક્શન પ્રાપ્ત થઈ શકે તે હેતુસર ડેપ્યુટી કલેક્ટરને આવેદનપત્ર આપી રજૂઆત કરી છે.

આ પણ વાંચો :અમદાવાદમાં યુનિવર્સિટી કન્વેનશન સેન્ટરમાં 900 બેડના કોવિડ સેન્ટરની તૈયારીઓ શરૂ

સિવિલ હોસ્પિટલમાંથી મળશે રેમડેસિવિર

ધોળકામાં સામુહિક આરોગ્ય કેન્દ્ર અને ત્રણ ખાનગી હોસ્પિટલોમાં કોવિડ 19 અંતર્ગત કોરોના પોઝિટિવ દર્દીઓને સારવાર મળે તે હેતુસર 48 બેડની સુવિધા આપવામાં આવી છે. ધોળકાની જે તે હોસ્પિટલમાં કોરોના પોઝિટિવ દર્દીઓ સારવાર લઇ રહ્યા છે અને જેમને રેમડેસિવિરની જરૂરિયાત છે તેવા દર્દીઓને ડૉક્ટરના પ્રિસ્ક્રિપ્શન સાથે સિવિલ હોસ્પિટલમાંથી મળશે.