'આર્ટિકલ 15': આયુષ્યમાનને જાનથી મારી નાખવાની મળી ધમકી

મુંબઈઃ બૉલીવુડ અભિનેતા-ગાયક આયુષ્યમાન ખુરાનાની ફિલ્મ આર્ટિકલ-15 આવતીકાલે (28 જૂન) રિલીઝ થવા જઈ રહી છે. આ ફિલ્મની કહાની સમાજમાં દલિતોની વિરુદ્ધ થઈ રહેલા અત્યાતચારો અને ભેદભાવ પર આધારિત છે.

આયુષ્યમાન અને ફિલ્મના ડીરેક્ટર અનુભવ સિન્હાને ફિલ્મની રિલીઝ પહેલા ધમકીઓ મળી રહી છે. તદ્ઉપરાંત થિયેટરના માલિકોને પણ ચેતવણી આપવામાં આવી છે કે, જો તેઓ આ ફિલ્મને રિલીઝ કરશે તો, તેમના વિરુદ્ધ હિંસક પ્રદર્શનો કરવામાં આવશે.

આયુષ્યમાન અને અનુભવને સતત જાનથી મારી નાખવાની ધમકી આપવામાં આવી રહી છે. આ સમગ્ર મામલામાં નિર્દેશક અને અભિનેતા આયુષ્યમાનનું કહેવું છે કે, આ ફિલ્મ કોઈ ખાસ જાતિને ટાર્ગેટ કરી રહી નથી. તમારે સેન્સર બોર્ડનું સન્માન કરવું જોઈએ અને ફિલ્મને જોયા બાદ જ કોઈ પણ પ્રતિક્રિયા આપવી જોઈએ.

આપને જણાવી દઈએ કે, આર્ટિકલ-15 ફિલ્મની પૂરી કહાની બદાયૂમાં થયેલા દુષ્કર્મ અને હત્યાથી પ્રેરિત છે. ફિલ્મનું ટ્રેલર સામે આવ્યા બાદ જ ઉત્તર પ્રદેશના બ્રાહ્મણ સમાજે આ ફિલ્મનો જોરદાર વિરોધ કર્યો છે. વિરોધીઓના જણાવ્યા મુજબ, આરોપીને બ્રાહ્મણ તરીકે દર્શાવવામાં આવતો હોવાથી તેમની જાતિની ખોટી રજૂઆત થઈ રહી છે.

આયુષ્યમાન ખુરાનાની આ ફિલ્મ 28 જૂનના રોજ રિલીઝ થશે. આ ફિલ્મમાં, આયુષ્યમાન ખુરાનાની સાથે ઇશા તલવાર, એમ નસાર, મનોજ પહવા, સયાની ગુપ્તા, કુમુદ મિશ્રા અને મોહમ્મદ ઝીશાન આયુબ મુખ્ય ભૂમિકામાં જોવા મળશે.