સુરતમાં કોરોના વેક્સિનેશન અંગે શું એક્શન પ્લાન છે?

સુરત મહા નગરપાલિકા દ્વારા શહેરમાં રહેતા લોકોને કોરોના વાઇરસની વેક્સિનેશન આપવા માટે તમામ પ્રકારની તૈયારી શરૂ કરી દેવામાં આવી છે. સરવે, રજિસ્ટ્રેશન અને કોલ્ડ સ્ટોરેજથી લઈ વેક્સિનેશનની આડઅસર થાય તે તમામ બાબતો અંગે પાલિકા દ્વારા તૈયારીઓ કરી લેવામાં આવી છે. સાથે જ કેટલાક લોકો જેમની પાસે રિફ્યુઝલ મળે છે તેમાં સમાજના અગ્રણીઓ સાથે પાલિકા કમિશનર બંછાનિધી પાની બેઠક પણ કરવાના છે. સુરતમાં વેક્સિનેશનને લઈ શું એક્શન પ્લાનિંગ છે અને અત્યાર સુધી કેટલી કામગીરી કરવામાં આવી છે તે અંગે મ્યુનિસિપલ કમિશનરે ETV Bharatને તમામ માહિતી આપી હતી.

• સુરતમાં કોરોના વેક્સિનેશનને લઈને કોર્પોરેશનની તૈયારી પૂરજોશમાં
• લગભગ 5.15 લાખ પૈકી 4.18 લાખ લોકોના રજિસ્ટ્રેશન પૂર્ણ
• 50 વર્ષથી વધુ વયના લોકોને કોરોના વેક્સિન પહેલા અપાશે
• 50 વર્ષથી નાના અને ગંભીર રોગ ધરાવતા લોકોને પણ પહેલા વેક્સિન મળશે

સુરતઃ સુરતમાં કોરોના વેક્સિનેશન અંગેની તૈયારી પૂરજોશમાં ચાલી રહી છે. ત્યારે આ અંગે ઈટીવી ભારતની ટીમે મ્યુનિસિપલ કમિશનર બંછાનિધી પાની સાથે મુલાકાત કરી હતી. મ્યુનિસિપલ કમિશનરે જણાવ્યું હતું કે, હેલ્થ વર્કરનો ડેટાબેઝ પૂર્ણ કરી દેવામાં આવ્યો છે. આ સાથે ફ્રન્ટલાઈન વોરિયર્સ ડેટાબેઝ તૈયાર કરવાના છે, જે લોકો 50 વર્ષથી ઉપરના છે અને ગંભીર રોગથી પીડાય છે અને જે લોકો 50 વર્ષની નીચે છે અને ગંભીર રોગોથી પીડાય છે તેઓનું રજિસ્ટ્રેશન કરવામાં આવી રહ્યું છે. લગભગ 5.15 લાખ પૈકી 4.18 લાખ લોકો માટે જે કામગીરી છે એ પૂર્ણ કરી દેવામાં આવી છે. લગભગ 85 ટકા કામગીરી અત્યારે પૂર્ણ થઈ ચુકી છે.

કેટલાક કિસ્સામાં રિફ્યૂઝલ મળતા સામાજિક આગેવાનો સાથે બેઠક યોજાશે

મ્યુનિસિપલ કમિશનરે જણાવ્યું હતું કે, આગામી દિવસોમાં પણ રજિસ્ટ્રેશનની કામગીરી ચાલુ રહેશે. કારણ કે, એમાં એવું પણ જોવા મળ્યું છે. કેટલાક લોકો બહાર માઈગ્રેટ થયેલા છે અને કેટલા લોકોના ઘર બંધ છે. કેટલા લોકોના કિસ્સામાં રિફ્યુઝલ મળ્યા છે. એટલે આપણે સામાજિક આગેવાનો સાથે રહીને સંપૂર્ણપણે લોકો રજિસ્ટ્રેશન કરે એના માટે પ્રયત્ન હાથ ધરવામાં આવ્યા છે અને એની સાથે સાથે લોકોને પણ વિનંતી કરવામાં આવે છે. કારણકે, આ વ્યક્તિઓનું વેક્સિનેશન રજિસ્ટ્રેશન ખૂબ અગત્યનું છે અને લોકોના સ્વાસ્થ્ય માટે અને શહેરના સ્વાસ્થ માટે ખૂબ અગત્યનું હોય જેટલા લોકોના રજિસ્ટ્રેશન હજૂ સુધી નથી થયા એ લોકોના માટે સર્વેલન્સ વર્કર લોકોના ઘરે ઘરે જાય છે. એ લોકોને વિનંતી છે કે, સાથ સહકાર આપી વેક્સિનેશન રજિસ્ટ્રેશન પૂર્ણ કરે અને જ્યારે વેક્સિનેશન આવે ત્યારે ત્યારે વેક્સિનેશન લઈ સંપૂર્ણ રીતે તંદુરસ્ત અને સ્વસ્થ રહે.

આડઅસર માટે કેન્દ્ર પર 14 અલગ અલગ ઈન્જેક્શન રાખવામાં આવશે

મ્યુનિસિપલ કમિશનરે વધુમાં જણાવ્યું કે, શહેરમાં વેક્સિનેશનના લગભગ 542 કેન્દ્રો છે. જો વેક્સિનેશનને લઈ કોઈ આડઅસર થાય તો કેન્દ્રને અગાઉથી જ કોઈને કોઈ એક હોસ્પિટલ સાથે જોડી દેવામાં આવી છે. કેન્દ્રમાં ત્રણ પ્રકારના રૂમ છે. પહેલાં રજિસ્ટ્રેશન પછી વેક્સિનેશન અને એડમિનિસ્ટ્રેશન અને જો એડવર્સ ઈમ્પેક્ટ એટલે આડઅસર થાય તો 30 મિનિટ તેમણે જોવાનું રહેશે અને એમાં કોઈ આડ અસર થાય તો નજીકના જ આરોગ્ય કેન્દ્ર છે. ત્યાં એમને શિફ્ટ કરી દેવામાં આવશે, પરંતુ જે વેક્સિનેશન કેન્દ્રો છે એમાં પણ લગભગ 14 અલગ અલગ ઈન્જેક્શન રાખવામાં આવશે. કોઈ પણ આડ અસર થાય તો એના માટે પણ સંપૂર્ણ તૈયારી રાખવામાં આવશે.

વેક્સિન રહી શકે તે માટેની પણ તમામ વ્યવસ્થા કરાઈ છે

એટલે કે સંપૂર્ણપણે અત્યારે જે વેક્સિનેશન કેન્દ્રો છે અને એના જે એસોસિએશન છે અને ખાસ કરીને જે રેફરેલ કેન્દ્ર છે તેની સાથે એમને પણ જોડી દેવામાં આવ્યા છે. એના સાથે સાથે લોજિસ્ટિ જે પાર્ટ છે. એના ટ્રાન્સપોર્ટેશનનો બાબત હોય એના માટે પણ વ્યવસ્થા કરવામાં આવી છે. આ ઉપરાંત સૌથી અગત્યની વાત કોલ્ડ ચેઈન મેનેજમેન્ટની છે અને કોલ્ડ ચેઈન મેનેજમેન્ટ દ્વારા પણ એક સમયે 11.67 લાખ વેક્સિન રહી શકે આ પ્રકારની વ્યવસ્થા પણ કરવામાં આવી છે.

વેક્સિનેશનની જાણકારી SMSથી મળશે

લોકો દ્વારા જે મોબાઈલ નંબર આપવામાં આવ્યા છે, તેમને એસએમએસ દ્વારા જાણ કરવામાં આવશે અને એની સાથે સાથે આપણા જે સર્વેલન્સ વર્કર છે. તે સર્વેલન્સ વર્કર પણ જે વ્યક્તિને લેવાની રહેશે એને રૂબરૂ પણ જાણ કરશે.