સુરતમાં કાયદો અને વ્યવસ્થાની સ્થિતિ કથળી, 24 કલાકમાં 2 મર્ડર

સુરત : છેલ્લા ચોવીસ કલાકમાં હત્યાની બીજી ઘટના પ્રકાશમાં આવી છે. ટેક્સટાઈલ માર્કેટના કાપડના વેપારીની હત્યા બાદ સુરતના માન દરવાજા વિસ્તારમાં આવેલા ટેનામેન્ટમાં રહેતા યુવકની અજાણ્યા શખસોએ સમી સાંજે તીક્ષ્ણ છરી વડે ઉપરાછાપરી ઘા ઝીંકી હત્યા કરી હતી. હત્યાની ઘટના બાદ સલાબતપુરા પોલીસે ઘટના સ્થળે પહોંચી તપાસ શરૂ કરી છેા. યુવકની હત્યા કોણે અને શા માટે કરી? તે અંગે પોલીસે તપાસ શરુ કરી છે.

સલાબતપુરા વિસ્તારમાં આવેલ બી ટેનામેન્ટના બિલ્ડીંગ નંબર એકમાં સમી સાંજે અજાણ્યા શખ્સો દ્વારા ગિરીશ રાણા નામના યુવકની છરીના ઉપરાછાપરી ઘા ઝીંકી હત્યા કરી દેવામાં આવી હતી. હત્યાની ઘટના બાદ ટેનામેન્ટમાં રહેતા લોકોમાં રીતસર નાશભાગ થઈ હતી. ઘટનાની જાણકારી મળતા સલાબતપુરા પોલીસ તથા ઉચ્ચ પોલીસ અધિકારીઓ ઘટના સ્થળે દોડી આવ્યા હતા. પોલીસ પહોંચે તે પહેલાં હત્યારાઓ નાસી છૂટયા હતા. પોલીસે લાશને પોસ્ટ-મોર્ટમ અર્થે સુરત નવી સિવિલ હોસ્પિટલ મોકલી હત્યારાઓની શોધખોળ શરૂ કરી છે.

યુવકની હત્યા બાદ લોકોમાં પણ રીતસર ભયનો માહોલ ઉભો થયો છે. કેટલાક અસામાજિક તત્ત્વો રસ્તા પર પસાર થતી યુવતીઓની મશ્કરી કરતા હોવાના આક્ષેપ સ્થાનિક લોકો દ્વારા કરાયા છે. ચરસ -ગાંજા સહિત જુગાર જેવી ગેરકાયદેસર પ્રવૃતિઓ પણ ધમધમતી હોવાની ફરિયાદ સ્થાનિક લોકોએ કરી હતી. પોલીસ આ વિસ્તારમાં સઘન પેટ્રોલિંગ વધારે તેવી માગ ઉઠી છે. સુરતમાં ચોવીસ કલાકમાં હત્યાની બીજી ઘટનાએ સુરતમાં કાયદા અને વ્યવસ્થા સામે સવાલ ઉભા કર્યા છે.