સુરતમાં પુત્રનો જીવ બચાવવા પરિવારે મૃતદેહને ખંભા પર ઉંચક્યો

સુરત શહેરના અડાજણ વિસ્તારમાં 20 વર્ષીય યુવકને કરંટ લગતા સિવિલ હોસ્પિટલ લઇ જવામાં આવ્યો હતો, જ્યાં ફરજ પરના તબીબે યુવકને મૃત જાહેર કર્યો હતો. જો કે, પોતાનો પુત્ર જીવતો જ છે, તેવી આશા સાથે પરિવાર તેને ખંભે ઉચકીને ખાનગી હોસ્પિટલ લઇ ગયા હતા, પરંતુ ખાનગી હોસ્પિટલે પણ તેને મૃત જાહેર કર્યો હતો. જેથી પરિવારમાં શોક વ્યાપી ગયો હતો.

• સુરતમાં 20 વર્ષીય યુવકને લાગ્યો કરંટ
• સિવિલે યુવકને મૃત જાહેર કર્યો
• પરિવારના સભ્યો ખંભે ઉચકીને ખાનગી હોસ્પિટલ લઇ ગયા

સુરતઃ શહેરની સિવિલ હોસ્પિટલમાં શુક્રવારે કરૂણ દ્રશ્યો સર્જાયા હતા. ચોકબજાર ફુલવાડીમાં રહેતો સદામ ઉર્ફે સિકંદર સાબિર શા અડાજણ ખાતે ઈલેક્ટ્રિકની દુકાનમાં કામ કરતો હતો. ગુરુવારે સાંજે તે આવાસમાં વોશિંગ મશીન રિપેરીંગ કરવા ગયો હતો. આ રિપેરીંગ દરમિયાન નીચે ભીની જગ્યામાં વિજપ્રવાહ પસાર થતા તેને કરંટ લાગતા તે બેભાન થઈ ઢળી પડ્યો હતો. જેથી તેને તેનો મિત્ર વાસીફ સિવિલ લઈ આવ્યો હતો, જ્યાં ફરજ પરના તબીબે તેને મૃત જાહેર કર્યો હતો. બનાવની જાણ થતા સિકંદરના પરિવારના સભ્યો સિવિલ હોસ્પિટલ આવી પહોંચ્યા હતા, જેમને સિકંદર જીવિત હોવાની આશા હતી. જેથી મૃતકનો પરિવાર મૃતદેહને ખંભા પર ઊંચકી ખાનગી હોસ્પિટલ લઇ ગયો હતો.

પોલીસ દોડી આવી

પોસ્ટમોર્ટમ કર્યા વિના મૃતદેહને લઈ જવાની વાત સાંભળી પોલીસ પણ હોસ્પિટલ દોળી આવી હતી. ત્યારબાદ પોલીસે પોસ્ટ મોર્ટમ અર્થે મૃતદેહને ફરી સિવિલમાં ખસેડી અકસ્માતે મોતનો ગુનો દાખલ કરી આગળની તપાસ હાથ ધરી છે.