રાજકોટ અગ્નિકાંડ: વધુ 2 આરોપી ડૉક્ટરની કરાઈ ધરપકડ, જામીન પર મુક્ત

રાજકોટના આનંદ બંગલા ચોક નજીક આવેલી ઉદય શિવાનંદ કોવિડ હોસ્પિટલમાં આગ લાગવાની ઘટનાને પગલે 5 જેટલા દર્દીના મોત થયા છે. જેને લઈને રાજકોટ પોલીસે આ મામલે હોસ્પિટલ સંચાલક સહિત 5 ડૉક્ટરો વિરુદ્ધ ગુનો નોંધ્યો છે. આ અગાઉ 3 ડૉક્ટરોની ધરપકડ કર્યા બાદ આજે આ મામલે વધુ 2 ડૉક્ટર્સની ધરપકડ કરવામાં આવી હતી. ડૉ.તેજશ અર્જુનભાઈ મોતિવરસ અને ડૉ.દિગ્વિજય સિંહ ભરતસિંહ જાડેજાની આજે બુધવારે ધરપકડ કરવામાં આવી હતી.

• રાજકોટ અગ્નિકાંડ મામલે વધુ 2 ડૉક્ટર્સની ધરપકડ
• રાજકોટ પોલીસે બન્ને ડૉક્ટર્સને કોર્ટમાં રજૂ કર્યા
• કોર્ટે 2 ડૉક્ટરના જામીન મંજૂર કર્યા હતા
• અત્યારે પાંચે ડોક્ટર જામીન પર છે

રાજકોટઃ રાજકોટ હોસ્પિટલ અગ્નિકાંડ મુદ્દે આજે ઝડપી પાડવામાં આવેલા 2 ડૉક્ટરોને પણ પોલીસે કોર્ટમાં રજૂ કર્યા હતા. પોલીસે 3 દિવસના રિમાન્ડની માગણી કરી હતી. જો કે, કોર્ટ દ્વારા પોલીસ રિમાન્ડની માગણી ફગાવાઈ હતી. તેમ જ બન્ને આરોપી ડૉક્ટરના જામીન મંજૂર કરવામાં આવ્યા હતા. આ અગાઉ પણ ઝડપાયેલા ત્રણેય આરોપી ડૉક્ટર્સના કોર્ટ દ્વારા જામીન મંજૂર કરવામાં આવ્યા છે, ત્યારે આજે વધુ 2 ડૉક્ટર્સના જામીન મંજૂર કરાતા આ ગુનાના પાંચેય આરોપી ડૉક્ટર હાલ જામીન પર છે.

રાજકોટ અગ્નિકાંડ: વધુ બે આરોપી ડોકટરની કરાઈ ધરપકડ, જામીન પર મુક્ત

અગાઉ ત્રણ ડૉક્ટર્સની પણ કરાઈ હતી ધરપકડ

અગ્નિકાંડ મામલે કુલ 5 ડૉક્ટર વિરુદ્ધ ગુનો નોંધવામાં આવ્યો છે. જેમાં હોસ્પિટલનું સંચાલન કરતા ડૉ. પ્રકાશ મોઢા, ડૉ.વિશાલ મોઢા અને ડૉ.તેજસ કરમટાની પોલીસે 2 દિવસ પહેલા અટકાયત કરી હતી. તેમ જ તેમને કોર્ટમાં રજૂ કર્યા હતા. જેમને કોર્ટ દ્વારા જામીન આપવામાં આવ્યા હતા, ત્યારે આજે બુધવારે આ ગુનામાં વધુ 2 ડૉક્ટર્સ ડૉ.તેજસ અને ડૉ.દિગ્વિજયસિંહ જાડેજાની ધરપકડ કરીને કોર્ટમાં રજૂ કરવામાં આવ્યા હતા.