જૂનાગઢમાં ગિરનાર પર નિર્માણ કરાયેલા શૌચાલયમાં પાણીની વ્યવસ્થા ન હોવાથી શૌચાલય બંધ

ગિરનાર પર્વત પર રોપ-વે શરૂ થતા જ ખૂબ જ મોટા પ્રમાણમાં યાત્રિઓનો ધસારો અંબાજી મંદિર પર જોવા મળે છે. તેને ધ્યાને રાખીને યાત્રાધામ વિકાસ બોર્ડ દ્વારા ગિરનાર પર્વત પર અંદાજિત 1 કરોડ કરતા વધુના ખર્ચે જાહેરશૌચાલયનું નિર્માણ કરવામાં આવ્યું હતું. એક વર્ષ પછી નિર્માણ પામેલું આ શૌચાલય આજે શોભાના ગાંઠિયા સમાન બની રહ્યું છે. શૌચાલયનું નિર્માણ થયા પછી તેને શરૂ કરવાને લઈને પૂરતા પ્રમાણમાં પાણી નહિ હોવાને કારણે આ શૌચાલય આજે બંધ જોવા મળ્યું. આ સમગ્ર ઘટનાને લઈને યાત્રાધામ વિકાસ બોર્ડના વહીવટી અધિકારી સુથાર સાથે ETV Bharatએ વાતચીત કરી હતી. તેમણે જણાવ્યું હતું કે, આગામી દિવસોમાં પાણીની વૈકલ્પિક વ્યવસ્થાઓ કરીને બંધ શૌચાલયને ફરી શરૂ કરવાની દિશામાં કામગીરી હાથ ધરવામાં આવી છે.

• ગિરનાર પર્વત પર 1 કરોડ કરતા વધુના ખર્ચે તૈયાર થયેલું જાહેર શૌચાલય
• યાત્રાધામ વિકાસ બોર્ડે પાણીની વ્યવસ્થા વગર જાહેર શૌચાલય બનાવ્યું
• પાણીની વૈકલ્પિક વ્યવસ્થા કરીને શૌચાલય શરૂ કરાશે

જૂનાગઢ :ગિરનાર પર્વત પર એશિયાનો સૌથી લાંબો ઉડન ખટોલા રોપ-વે બનતાની સાથે જ ગિરનાર પર્વત પર આવેલા અંબાજી મંદિરના દર્શનાર્થે ખૂબ બહોળા પ્રમાણમાં યાત્રિકો અને પ્રવાસીઓ આવી રહ્યા છે. જેને ધ્યાને રાખીને ગુજરાત યાત્રાધામ વિકાસ બોર્ડ દ્વારા ગિરનાર પર્વત પર અહીં આવતા પ્રવાસીઓ અને ભક્તો માટે જાહેર શૌચાલયનું અંદાજિત એક કરોડ કરતાં વધુની રકમના ખર્ચે તૈયાર કરાયું છે.

શૌચાલયમાં પાણીની વ્યવસ્થા ન હોવાથી શૌચાલય બંધ

શૌચાલય પ્રવાસીઓ માટે વપરાશ કરી શકે તે માટે ખુલ્લુ મુકાયું નથી

આ શૌચાલયના નિર્માણ થયાને આજે એક વર્ષ કરતાં વધુ સમય વીતી ચૂક્યો છે. તેમ છતાં શૌચાલય હજુ સુધી અહીં આવતા પ્રવાસીઓ અને ભક્તો માટે વપરાશ કરી શકે તે માટે ખુલ્લુ મુકવામાં આવ્યું નથી. આ સમગ્ર ઘટનાને લઈને યાત્રાધામ વિકાસ બોર્ડના વહીવટી અધિકારી સુથાર સાથે ETV Bharatએે કરેલી વાતચીત દરમિયાન અધિકારીએ જણાવ્યું હતું કે, શૌચાલય સ્થળ પર પાણીની વૈકલ્પિક વ્યવસ્થા થયા પછી તેને ઉપયોગ માટે ખુલ્લું મૂકવામાં આવશે.

બે વર્ષ પૂર્વે સાડા ત્રણ હજાર કરતા વધુ ફૂટની ઊંચાઈ પર જાહેર શૌચાલય બનાવવાનો નિર્ણય

યાત્રાધામ વિકાસ બોર્ડ આજથી બે વર્ષ પૂર્વે સાડા ત્રણ હજાર કરતા વધુ ફૂટની ઊંચાઈ પર જાહેર શૌચાલય બનાવવાનો નિર્ણય કર્યો હતો. તે ખરેખર આવકારદાયક હતો. ગિરનાર પર્વત પર જાહેર શૌચાલય જેવી એક પણ વ્યવસ્થા અત્યારસુધી જોવા મળતી ન હતી. યાત્રાધામ વિકાસ બોર્ડનું કામ ખૂબ સારું હશે તેવું સૌ કોઈ માની રહ્યા હતા.

ગિરનાર પર્વત

1 કરોડ કરતા વધુની રકમ શૌચાલય પાછળ ખર્ચી

3,500 ફૂટની ઊંચાઈ પર શૌચાલય માટે પાણીની વ્યવસ્થા ક્યા પ્રકારે થશે તેને લઈને વિકાસ બોર્ડના અધિકારીઓએ કાચું કાપી નાંખીને જાહેર શૌચાલય નિર્માણ કાર્ય શરૂ કરી દીધું હતું. આ શૌચાલયના ઉપયોગ માટે મહત્વનું પાણી કઈ રીતે ત્યાં સુધી પહોંચશે ? તેનો જરા પણ વિચાર કર્યા વગર 1 કરોડ કરતા વધુની રકમ શૌચાલય પાછળ ખર્ચી નાખી અને અંતે આટલો ખર્ચ કર્યા પછી પણ જાહેર શૌચાલય પબ્લિકના ઉપયોગ માટે આજે પણ બંધ જોવા મળે છે.

શૌચાલય પાણીની વૈકલ્પિક વ્યવસ્થા થવાની સાથે શરૂ થશે

એક કરોડ કરતા વધુના ખર્ચે નિર્માણ કરીને બંધ કરી દેવામાં આવેલું શૌચાલય પાણીના વૈકલ્પિક વ્યવસ્થા થવાની સાથે શરૂ કરી દેવામાં આવશે. તેવું યાત્રાધામ વિકાસ બોર્ડના અધિકારીઓ જણાવી રહ્યા છે. શૌચાલય સુધી પાણી પહોંચાડવા માટે અધિકારીઓ દ્વારા વરસાદનું પાણી ગિરનાર પર્વત પર કોઈ જગ્યા પર એકત્રિત કરીને તેને ત્યાંથી જાહેર શૌચાલય સુધી પહોંચાડવાની યોજના પર કામ ચાલી રહ્યું છે.

સંગ્રહિત વરસાદી પાણીનો ઉપયોગ જાહેર શૌચાલય માટે કરાશે

આગામી દિવસોમાં આ યોજના પૂર્ણ થશે તે સંગ્રહિત વરસાદી પાણીનો ઉપયોગ જાહેર શૌચાલય માટે કરવામાં આવશે તેવું અધિકારીઓ જણાવી રહ્યા છે. પરંતુ જે પ્રકારે પાણીની વૈકલ્પિક વ્યવસ્થાનો વિચાર કર્યા વગર જાહેર શૌચાલયનું નિર્માણ કાર્ય પૂરું કરી દીધું છે. ત્યારે હવે વરસાદી પાણી પર જાહેર શૌચાલય કેટલું નભી શકશે તે આવનારા દિવસો બતાવશે.

આ પણ વાંચો -