રાજ્યમાં નવી શિક્ષણનીતિના અમલીકરણ માટે બેઠકનો દોર શરુ: શિક્ષણ પ્રધાન

દેશના રાષ્ટ્રપતિ રામનાથ કોવિંદ અને વડાપ્રધાન નરેન્દ્ર મોદીએ નવી શિક્ષણનીતિ સંદર્ભે યોજાયેલા કાર્યક્રમમાં ઓનલાઈન હાજરી આપી હતી. ભારત સરકારના શિક્ષણ વિભાગ દ્વારા યોજાયેલી ગવર્નર્સ કોન્ફરન્સમાં નવી રાષ્ટ્રીય શિક્ષણ નીતિ-2020ના અમલીકરણ તેમ જ ઉચ્ચ શિક્ષણમાં પરિવર્તન સંદર્ભે રાષ્ટ્રીય શિક્ષા નીતિ-૨૦૨૦ની ભૂમિકા વિષય પર તેઓએ માર્ગદર્શન આપ્યું હતું. આજના વેબીનારમાં રાજ્યના શિક્ષણપ્રધાન ભૂપેન્દ્રસિંહ ચૂડાસમા અને રાજ્યપાલ દેવવ્રત આચાર્ય જોડાયાં હતાં.

ગાંધીનગર : આ ગવર્નર્સ કોન્ફરન્સમાં દેશભરના રાજ્યોના રાજ્યપાલોએ ઉપસ્થિત રહીને પોતાના મંતવ્યો રજૂ કર્યાં હતાં. ગુજરાતના રાજ્યપાલ આચાર્ય દેવવ્રતે પોતાના મંતવ્યો રજૂ કરતાં જણાવ્યું હતું કે, નવી રાષ્ટ્રીય શિક્ષણ નીતિ-2020માં દેશના યુવાઓના સર્વાંગી વિકાસનું ચિંતન છે. તેમણે એમ પણ જણાવ્યું હતું કે, પૂર્વ પ્રાથમિક શિક્ષણથી લઈને ઉચ્ચ શિક્ષણ સુધીના તમામ ક્ષેત્રે બહુઆયામી ચિંતન દ્વારા જ્ઞાનસંપન્ન ભારતના નિર્માણનો પુરુષાર્થ નવી શિક્ષણ નીતિ દ્વારા કરવામાં આવ્યો છે. માતૃભાષામાં શિક્ષણ, પૂર્વ પ્રાથમિક શિક્ષણસ્તરથી જ બાળકનો સર્વાંગી વિકાસ, બહુવિષયી અધ્યયન, મૂલ્યાંકન માટેની ગુણવત્તા અને શિક્ષક સજ્જતા જેવા અનેકવિધ સુધારાને કારણે દેશના યુવાનો સાંસ્કૃતિક મૂલ્યોના જતન સાથે જ્ઞાનકૌશલ્ય સંપન્ન બનશે અને યુવાનોને "વિશ્વ નાગરિક" બનાવવાનો સંકલ્પ સાકાર થશે.

નવી શિક્ષણનીતિ મુદ્દે વેબીનાર, રાજયમાં શિક્ષણનીતિ અમલી કરાવવા બેઠકોનો દોર શરૂ : ભૂપેન્દ્રસિંહ ચૂડાસમા

આ ગવર્નર્સ કોન્ફરન્સમાં રાષ્ટ્રપતિ રામનાથ કોવિંદે જણાવ્યું હતું કે, નવી શિક્ષણ નીતિ-2020એ કોઈ નીતિગત દસ્તાવેજ નહીં, પરંતુ નાગરિકો-યુવાનોની આકાંક્ષા પૂર્ણ કરવાનો અને દેશને શિક્ષણ ક્ષેત્રે "વૈશ્વિક કેન્દ્ર" બનાવવાનો ભગીરથ પ્રયાસ છે. તેમણે જણાવ્યું હતું કે, ભારતીય જીવન મૂલ્યો આધારિત આધુનિક શિક્ષણ પદ્ધતિ દ્વારા જ્ઞાનસંપન્ન સમાજના નિર્માણનું લક્ષ્ય નવી શિક્ષણ નીતિમાં પ્રતિબિંબિત થાય છે. રાષ્ટ્રપતિએ નવી શિક્ષણ નીતિના અમલીકરણમાં રાજ્યો અને રાજ્યપાલશ્રીઓની ભૂમિકાને મહત્ત્વપૂર્ણ ગણાવી હતી.

નવી શિક્ષણનીતિ મુદ્દે વેબીનાર, રાજયમાં શિક્ષણનીતિ અમલી કરાવવા બેઠકોનો દોર શરૂ : ભૂપેન્દ્રસિંહ ચૂડાસમા

આ પ્રસંગે વડાપ્રધાન નરેન્દ્ર મોદીએ નવી શિક્ષણ નીતિ-2020ને પ્રાસંગિક ગણાવી જણાવ્યું હતું કે, નવી શિક્ષણ નીતિના નિર્માણ સમયે 2 લાખથી વધુ લોકોના મંતવ્યોને ધ્યાને લેવામાં આવ્યાં છે તે જ રીતે નીતિના અમલીકરણ માટે પણ સતત વિચાર-વિમર્શ થાય તે જરૂરી છે. શિક્ષણ નીતિ કોઈ સરકારની નહીં પરંતુ સમગ્ર દેશની નીતિ છે તેમ જણાવી વડાપ્રધાન મોદીએ નવી શિક્ષણ નીતિને 21મી સદીના ભારતના સામાજિક અને આર્થિક જીવનને નવી દિશા આપનારી અને આત્મનિર્ભર ભારતના સામર્થ્યને સાકાર કરનારી ગણાવી હતી. તેમણે જણાવ્યું હતું કે, નવી શિક્ષણ નીતિ યુવાનોને તેમની અપેક્ષા પ્રમાણે જ્ઞાન અને કૌશલથી સજ્જ કરવા સ્ટડીને બદલે લર્નિંગ ઉપર તેમ જ ક્રિટિકલ થિંકિંગ ઉપર ભાર આપે છે, એટલું જ નહીં પ્રેક્ટિકલ અને પરફોર્મન્સ ઉપર પણ ધ્યાન આપે છે.

નવી શિક્ષણ નીતિ બાબતે વેબીનાર બાદ રાજ્યના શિક્ષણપ્રધાન ભૂપેન્દ્રસિંહ ચૂડાસમાએ જણાવ્યું હતું કે કેન્દ્ર સરકાર દ્વારા નવી શિક્ષણ નીતિ જાહેર કર્યા બાદ જ તરત જ રાજ્યમાં શિક્ષણના અમલને લઇને રાજ્ય સરકારે યુનિવર્સિટીઓ સાથે બેઠક યોજીને આગામી આયોજન પણ કરવામાં આવ્યું છે. જ્યારે આ નવી શિક્ષણ નીતિ રાજ્યમાં ઝડપી અમલવારી થાય તે અંગે પણ રાજ્ય સરકાર દ્વારા આયોજન કરવામાં આવ્યું છે.