દમણમાં બોગસ પ્રેક્ટિસ કરતા 5 બોગસ તબીબની ધરપકડ

કેન્દ્રશાસિત દમણમાં અલગ અલગ વિસ્તારમાં બોગસ તબીબી પ્રેક્ટિસ કરતા પાંચ બોગસ તબીબ પર આરોગ્ય વિભાગ અને પોલીસે રેડ કરી ધરપકડ કરતા આરોગ્ય સાથે ચેડાં કરતા તબીબોમાં ફફડાટ ફેલાયો છે.

• દમણમાં આરોગ્ય વિભાગનો સપાટો
• બોગસ તબીબો સામે કાર્યવાહી
• 5 બોગસ તબીબો દવાના જથ્થા સાથે ઝડપાયા

દમણ: સંઘપ્રદેશ દમણમાં બુધવારે દમણ આરોગ્ય વિભાગ અને પોલીસે 5 બોગસ તબીબને ઝડપી લીધા હતાં. ટીમે કચીગામ-ડાભેલથી 2, ભીમપોરથી 1 ઊંટવૈદની ધરપકડ કરી આગળની કાર્યવાહી હાથ ધરી છે. દમણ આરોગ્ય વિભાગ અને પોલીસે બુધવારે સંયુક્ત ઓપરેશન હાથ ધરીને કોઇપણ જાતની ડીગ્રિ વિના પ્રેક્ટિસ કરતા બોગસ તબીબો સામે કાર્યવાહી કરી છે. આ સંયુક્ત ઓપરેશનમાં પાંચ ઊંટવૈદને ઝડપી પાડવામાં આવ્યાં છે. જે અંગે આરોગ્ય વિભાગ અને વહીવટીતંત્ર તરફથી વિગતો આપવામાં આવી હતી.

મામલતદાર-પોલીસની હાજરીમાં આરોગ્ય વિભાગે રેડ કરી

બોગસ તબીબો સામેની કાર્યવાહી સ્વાસ્થ વિભાગને મળેલી ફરિયાદ બાદ મામલતદાર સાગર ઠક્કર, જિલ્લા પંચાયતના BDO પ્રેમજી મકવાણા અને પોલીસ ટીમે પ્રદેશમાં ડીગ્રિ વિના લોકોના સ્વાસ્થય અને જીવન સાથે રમત રમનારા બોગસ તબીબ સામે કાર્યવાહી કરવા અભિયાન હાથ ધર્યુ હતું.

5 બોગસ તબીબ સામે કાર્યવાહી

આ અભિયાન અંતર્ગત કચીગામમાંથી 2, ડાભેલ વિસ્તારમાંથી બે અને ભીમપોરમાંથી 1 બોગસ તબીબને ઝડપી પાડીને તેમની સામે કાયદેસરની કાર્યવાહી કરી હતી. તેમજ વિભાગની તાત્કાલિક અસરથી તમામ દવાખાનાને બંધ કરી દીધા હતા.

બોગસ તબીબોમાં ફફડાટ

ઉલ્લેખનીય છે કે, રેડ દરમ્યાન આ બોગસ તબીબો દર્દીઓને વિવિધ બીમારીઓની દવા પણ આપતા હતાં. વહીવટીતંત્રએ બોગસ તબીબોના દવાખાનામાંથી મોટી માત્રામાં દવા, ઇન્જેક્શનનો જથ્થો પણ જપ્ત કર્યો છે. તેમજ આગામી દિવસોમાં આવા અન્ય બોગસ તબીબો સામે આ અભિયાન યથાવત રાખવામાં આવશે એવું જણાવતા બોગસ તબીબોમાં ફફડાટ ફેલાયો છે.