અમદાવાદ: શહેરમાં 2 ફેબ્રુઆરીના રોજ મુખ્ય પ્રધાન રૂપાણી વિશ્વ સ્તરીય સ્પોર્ટ ક્લબનું ઉદ્ઘાટન કરવાના છે. જેમાં આંતરરાષ્ટ્રીય સ્તરની સુવિધાઓ અને કોચિંગ આપવામાં આવશે. આ ક્લબમાં સમગ્ર વર્ષ દરમિયાન રાષ્ટ્રીય અને આંતરરાષ્ટ્રીય સ્તરની સંખ્યાબંધ ટુર્નામેન્ટનું આયોજન પણ કરવામાં આવશે.
આ અંગે સેવી ઈન્ફ્રાસ્ટ્રક્ચરના મેનેજિંગ ડિરેક્ટર જક્ષય શાહે જણાવ્યું કે, આપણા અમદાવાદમાં વિશ્વ સ્તરની સુવિધાઓ ધરાવતી તેમજ વૈશ્વિક પરિમાણ ધરાવનારી સેવી સ્વરાજ સ્પોર્ટ્સ ક્લબની રચના કરવામાં આવી છે. આ સ્પોર્ટ્સ ક્લબ રમતોના ચાહકોને અદ્યતન સુવિધાઓ અને નિષ્ણાંતોના મારફતે તાલીમ, ખેલ ભાવના અને ચારિત્ર્ય સાથે પોતાનું ધ્યેય સાકાર કરવાની સગવડ પૂરી પાડશે.
આ ક્લબમાં 50 મીટરનો ઓલિમ્પિક સાઈઝનો સ્વિમિંગ પુલ, કિડ્સ પુલ, ફૂટબોલ ફિલ્ડ, ક્રિકેટ પીચ, ટેનીસ, બેડમિન્ટન, સ્ક્વોશ, બાસ્કેટ બોલ કોટ, ટેબલ ટેનિસ અને 400 મીટર રિલે ટ્રેકનો સમાવેશ થાય છે. આ ઉપરાંત અદ્યતન સુવિધા સાથેનું જિમ્નેશિયમ, કાર્ડિયો પ્રોફેશનલ, ક્લાસીસ, સ્પોર્ટ્સ સાથે ખાસ કોચિંગ અને ટ્રેનિંગની સુવિધાનો સમાવેશ થાય છે. આ ક્લબ 6 એકર વિસ્તારમાં ફેલાયેલો છે અને 200 કરોડના ખર્ચે તેનું નિર્માણ કરવામાં આવ્યું છે.
