ગૃહપ્રધાને BRTS રૂટમાં થતી મુશ્કેલી અંગે જાતે નિરીક્ષણ કર્યું હતું. દરમિયાન સમગ્ર રૂટ પર વાહનચાલકોને અને લોકોને પડતી અગવડો તેમજ પ્રશ્નો અંગે ચર્ચા કરી હતી. ઉપરાંત સ્થાનિકો સાથે વાતચીત કરી અને નિરાકરણ લાવવા અંગેના મંતવ્યો લીધા હતા. જેમાં સ્થાનિકોએ વાળીનાથ ચોક પાસે ફૂટ ઓવરબ્રિજ બનાવવા માટેનું સૂચન કર્યું હતું.
દરમિયાન ગૃહપ્રધાન દ્વારા BRTS રૂટ પર જ્યાં મિક્સ ટ્રાફિક થાય છે, ત્યાં બમ્પ મુકવાની તેમજ વચ્ચે આવતી અડચણોને દૂર કરવા મામલે પણ સૂચનો લેવામાં આવ્યાં હતાં. ગૃહપ્રધાને સ્થાનિક ધારાસભ્ય તેમજ લોકોના મંતવ્યો સાંભળ્યા હતા. ઉપરાંત જે પણ ધારાસભ્યના વિસ્તારમાં BRTS રૂટના કારણે થતી તકલીફ અંગે પત્ર લખી જાણ કરવા જણાવ્યું હતું.
ગૃહપ્રધાને જણાવ્યું હતું કે, સ્થાનિક ધારાસભ્યો અને અધિકારીઓ તરફથી જે પણ સૂચનો મળ્યા છે. તેનો આગામી દિવસમાં અમલ કરી અને ટ્રાફિક વ્યવસ્થા વધુ સૂચારુ રૂપ બને તેનું આયોજન કરવામાં આવશે. BRTS બસના ચાલકો વર્કિંગ અવર્સની અંદર જ કામ કરે અને જે ગતિ મર્યાદા નક્કી કરી છે, તે મર્યાદામાં જ વાહન ચલાવે તેવા સૂચનો કરવામાં આવ્યા છે. આ મામલે બનાવવામાં આવેલી કમિટી સમક્ષ સૂચનો આવશે તેનો આગામી દિવસમાં અમલ કરવામાં આવશે.