આત્મનિર્ભર મંત્રઃ સ્વદેશી અપનાવો, ગાંધીઆશ્રમ દ્વારા ખાદીના માસ્ક બનાવી નિઃશુલ્ક વિતરણ

પીએમ મોદીએ જ્યારથી આત્મનિર્ભર મંત્ર ભણ્યો છે ત્યારથી ગાંધીજી અને સ્વદેશીનું વાતાવરણ જીવંત થઈ ગયું છે. ત્યારે ગાંધીઆશ્રમને કેમ ભૂલી જવાય! આત્મનિરભરતાનો સિક્કો એટલે ખાદી એમ ચોક્કસ કહી શકાય. ગાંધીઆશ્રમમાં હાલ ખાદીના માસ્ક તૈયાર થઈ રહ્યાં છે અને તેનું નિઃશુલ્ક વિતરણ પણ કરવામાં આવી રહ્યું છે.

અમદાવાદ: વડાપ્રધાન નરેન્દ્ર મોદીએ સ્વદેશી વસ્તુઓ અપનાવવા માટે લોકોને અપીલ કરી છે. તેમ જ દેશવાસીઓને આત્મનિર્ભર બનવા આહવાન આપ્યું છે. જ્યારે કોરોનાથી બચાવ માટે માસ્ક હવે જીવનમાં ફરજ બની ગયો છે. કોરોના મહામારી દિનપ્રતિદિન વધી રહી છે અને અમદાવાદમાં પણ કેસો કૂદકેને ભૂસકે વધી રહ્યા છે ત્યારે અમદાવાદમાં ગાંધીઆશ્રમ સામે આવેલા ઇમામ મંઝિલ ખાદી વણાટ અને વેચાણ કેન્દ્રમાં રોજના 100 જેટલા ખાદીના માસ્ક બનાવી આશ્રમની આસપાસની સોસાયટીમાં મફત આપવામાં આવી રહ્યાં છે. અત્યાર સુધીમાં 1200 જેટલા માસ્ક આશ્રમમાં રહેતાં લોકોના પરિવારને નિઃશુલ્ક આપવામાં આવ્યાં છે.

ખાદી વણાટ કેન્દ્ર ચલાવતાં આશ્રમવાસી ધીમંત બઢિયા જણાવે છે કે જ્યારે વડાપ્રધાન નરેન્દ્ર મોદી આત્મનિર્ભર બનવાની સાથે સ્વદેશી અપનાવવાની વાત કરતા હોય ત્યારે ખાદીથી વિશેષ બીજું કંઇ ન હોઈ શકે. અમે અહીં આશ્રમવાસીઓ 102 વર્ષથી રહીને ખાદી જ પહેરી તેનું વેચાણ પણ કરીએ છીએ. કોરોનાની મહામારીમાં જ્યારે હવે માસ્ક આવશ્યક બન્યો છે. ત્યારે અમે છેલ્લાં અઠવાડિયાથી ખાદીના કાપડમાંથી ખાદીના જ માસ્ક બનાવી રહ્યાં છે અને અત્યાર સુધી આશ્રમવાસીઓના ઘરમાં પહોંચાડ્યાં છે. હવે જ્યારે લૉકડાઉન ખુલશે અને વિદેશી પર્યટકો પણ આશ્રમમાં આવશે ત્યારે પણ અમે તેમની પાસેથી આ માસ માટેના કોઈ પણ રૂપિયા લેવાના નથી. ગાંધીઆશ્રમ સહિત આ વિસ્તારમાં 1200 જેટલા આશ્રમવાસીઓ તેમના પરિવાર સાથે રહે છે અને તમામના ઘરે ખાદીના માસ્ક આપવામાં આવ્યાં છે. વળી ખાદીના માસ્કની નવીનતા એ છે કે વિવિધ રંગની ખાદી અને સફેદ રંગના પણ અત્યાર સુધીમાં 3000 જેટલા માસ્ક બનાવવામાં આવ્યાં છે. જેમાંથી 1૩00 જેટલા માસ્ક આશ્રમમાં વસતાં આશ્રમવાસીઓને નિઃશુલ્ક વિતરણ કરવામાં આવ્યાં છે.