ગાંધીનગર: દેશના વડાપ્રધાન નરેન્દ્ર મોદીએ કહ્યું કે, દેશમાં સેમિકન્ડક્ટર મેન્યુફેક્ચરિંગ પ્લાન્ટ સ્થાપવા માટે ટેક્નોલોજી કંપનીઓને 50 ટકા નાણાકીય સહાય આપવામાં આવશે. શુક્રવારે આની જાહેરાત કરતા તેમણે કહ્યું કે, તેમની સરકારે સેમિકન્ડક્ટર ઉદ્યોગોને તમામ પ્રકારની સુવિધાઓ આપી છે. ગાંધીનગરમાં 'સેમિકોન ઈન્ડિયા 2023' કોન્ફરન્સનું ઉદ્ઘાટન કર્યા બાદ મોદીએ કહ્યું હતું કે, દેશમાં સેમિકન્ડક્ટર ઉદ્યોગના વિકાસ માટે સંપૂર્ણ ઈકોસિસ્ટમ તૈયાર કરવામાં આવી રહી છે.
પીએમ મોદીએ કહ્યું:'અમે સેમકોન ઈન્ડિયા પ્રોગ્રામ હેઠળ પ્રોત્સાહનો ઓફર કરી રહ્યા હતા. હવે તેમાં વધારો કરવામાં આવ્યો છે, અને હવે ટેક્નોલોજી કંપનીઓને ભારતમાં સેમિકન્ડક્ટર મેન્યુફેક્ચરિંગ પ્લાન્ટ્સ સ્થાપવા માટે 50 ટકા નાણાકીય સહાય મળશે.
સેમિકન્ડક્ટર ડિઝાઇન પર કોર્સ શરૂ થશે:મોદીએ કહ્યું કે, ભારતમાં સેમિકન્ડક્ટર ઉદ્યોગ ઝડપથી વિકાસ પામશે. તેમણે કહ્યું કે, એક વર્ષ પહેલા લોકો પૂછતા હતા કે તેઓએ ભારતના સેમિકન્ડક્ટર સેક્ટરમાં શા માટે રોકાણ કરવું જોઈએ, અને હવે તેઓ પૂછે છે કે ભારતમાં રોકાણ કેમ ન કરવું. મોદીએ કહ્યું કે, વિશ્વને એક વિશ્વસનીય ચિપ સપ્લાય ચેઇનની જરૂર છે. મોદીએ કહ્યું કે, સેમિકન્ડક્ટર ડિઝાઇન પર અભ્યાસક્રમો શરૂ કરવા માટે ભારતમાં 300 શાળાઓની ઓળખ કરવામાં આવી છે.