દિલ્હીમાં કોરોનાના કેસમાં સતત્ત વધારો, સંક્રમિતની સંખ્યા 66 હજારને પાર

કોરોનાએ ફરીથી દિલ્હીમાં રેકોર્ડ તોડ્યા છે. એક દિવસમાં કોરોનાની સંખ્યા 4 હજાર થઇ ગઇ છે. જ્યારે કુલ આંકડો 66 હજારને પાર થઇ ગયો છે.

નવી દિલ્હી : દેશની રાજધાની નવી દિલ્હીમાં કોરોના વાઇરસના કેસોમાં સતત્ત વધારો થઇ રહ્યો છે. મંગળવારે રાજધાની દિલ્હીમાં સામે આવેલા કોરોના કેસએ અગાઉના તમામ રેકોર્ડ તોડી નાખ્યા હતા. છેલ્લા 24 કલાકમાં રાજધાની દિલ્હીમાં 3947 દર્દીઓ નોંધાયા છે અને 68 લોકોના મોત નીપજ્યા છે. નવા દર્દીઓ નોંધાયા પછી દિલ્હીમાં કોરોના દર્દીઓની સંખ્યા વધીને 66,602 થઈ ગઈ છે. રાજધાનીમાં કોરોનાને કારણે અત્યાર સુધી 2301 લોકોના મોત નીપજ્યાં છે.

નોંધનીય છે કે દિલ્હીના સીએમ અરવિંદ કેજરીવાલે સોમવારે એક પ્રેસ કોન્ફરન્સમાં કહ્યું હતું કે, અમે કોરોના ટેસ્ટમાં ત્રણ ગણાનો વધુ વધારો કર્યો છે. તેમણે કહ્યું કે, કેટલાક લોકોને તેમનો ટેસ્ટ કરાવવામાં મુશ્કેલી આવી રહી હતી, પરંતુ હું સમજું છું કે હવે કોઈ સમસ્યા નહી થાય. સીએમ કેજરીવાલે કહ્યું કે અગાઉ 5010 ટેસ્ટ દરરોજ થતા હતા, હવે દરરોજ 18000 થઈ રહ્યા છે.

મુખ્યપ્રધાને કહ્યું હતું કે, કેન્દ્ર સરકારની મદદથી દિલ્હીમાં રેપિડ એન્ટીજન ટેસ્ટ પણ શરૂ કરવામાં આવ્યા છે, જેનાથી 15થી 30 મિનિટમાં રિપોર્ટ આવી જશે. જે લોકોની ઘરે સારવાર કરવામાં આવી રહી છે આવા લોકોમાં સામાન્ય લક્ષણ હોય છે જેમ કે તાવ, ખાંસી અથવા તો અમુક વખત તેમનામાં કોઈ લક્ષણો દેખાતા નથી.આવા લોકોની ટીમ સતત ફોન કરીને તેમના સ્વાસ્થ્ય વિશે માહાતી મેળવે છે.

તેમણે કહ્યું હતું કે કોરોનાના સૌથી સામાન્ય લક્ષણમાં દર્દીને શ્વાસ લેવામાં તકલીફ પડે છે જેથી દર્દીને તરત ઓક્સિજનની જરૂર પડે છે. જો દર્દીને તરત ઓક્સિજન મળે, તો દર્દીને બચાવી શકાય છે. તેમણે કહ્યું હતું કે, દિલ્હી સરકાર હવે દરેક હોમ આઇસોલેશન લોકોને પલ્સ ઓક્સિમીટર આપશે, જ્યારે તમે સ્વસ્થ્ય થઇ જાયો ત્યારે તે સરકારને પરત કરવાનો રહેશે.