વોશિંગ્ટન/નવી દિલ્હી: અમેરિકી રાષ્ટ્રપતિ ડોનાલ્ડ ટ્રમ્પ 24-25 ફેબ્રુઆરીના 2 દિવસીય પ્રવાસે ભારત આવી રહ્યા છે. રાષ્ટ્રપતિ બન્યા બાદ આ તેમનો પ્રથમ ભારત પ્રવાસ છે. આ પ્રવાસ અંગે વ્હાઈટ હાઉસના અધિકૃત ટ્વીટર હેન્ડલ પરથી આ માહિતી આપવામાં આવી છે. ટ્વીટમાં જણાવાયું છે કે, રાષ્ટ્રપતિ ડોનાલ્ડ ટ્રમ્પ 24-25 ફેબ્રુઆરીએ વડાપ્રધાન નરેન્દ્ર મોદીને મળવા માટે ભારતના પ્રવાસે જવાના છે.
પત્નીને લાવશે સાથે
શેર કરવામાં આવેલા ટ્વીટમાં કહેવામાં આવ્યું છે કે, ટ્રમ્પનો આ પ્રવાસ અમેરિકા-ભારતની વ્યૂહાત્મક ભાગીદારીને વધુ મજબૂત બનાવશે, ભારત અને અમેરિકાના લોકો વચ્ચે મજબૂત અને સ્થિર સંબંધને રજૂ કરે છે. આ પ્રવાસ દરમિયાન ટમ્પના પત્ની અને અમેરિકાના ફર્સ્ટ લેડી મેલાનિયા ટ્રમ્પ પણ સાથે આવશે.
ઉલ્લેખનીય છે કે, અમેરિકાના પૂર્વ રાષ્ટ્રપતિ બરાક ઓબામાએ 2 વખત ભારતની મુલાકાત લીધી હતી. ઓબામા પ્રથમ વખત 2010માં આવ્યાં હંતા અને બીજી વખત 2015માં આવ્યાં હતાં.
ગુજરાતમાં આવવાની છે સંભાવના
ડોનાલ્ડ ટ્રમ્પની ગુજરાતની મુલાકાત લે એવી સંભાવના છે. ટ્રમ્પના પ્રવાસને લઇને ગુજરાત સરકારે તૈયારીઓ પણ શરૂ કરી દીધી છે. મળતી માહિતી મુજબ, ટ્રમ્પ અમદાવાદમાં સરદાર પટેલ પટેલ સ્ટેડિયમનું ઉદ્ધાટન કરી શકે છે. આ સ્ટેડિયમ દુનિયાનું સૌથી મોટું સ્ટેડિયમ છે અને તેની ક્ષમતા 1.10 લાખ પ્રેક્ષકોની છે.
ઉલ્લેખનીય છે કે, ગત વર્ષે વડાપ્રધાન નરેન્દ્ર મોદી અમેરિકા પ્રવાસે ગયા હતા, ત્યારે ટેક્સાસમાં 'હાઉડી મોદી' કાર્યક્રમમાં ભાગ લીધો હતો. વડાપ્રધાન મોદીએ તે સમયે ભારત આવવા માટે ટ્રમ્પને કહ્યું હતું.
