હૈદરાબાદ દુષ્કર્મ કેસ: દિલ્હી મહિલા આયોગ અધ્યક્ષ આમરણ ઉપવાસ પર

દિલ્હી: મહિલા આયોગ અધ્યક્ષ સ્વાતિ માલીવાલે જંતર-મંતર પર આમરણ ઉપવાસ પહેલા રાજઘાટ પહોંચીને રાષ્ટ્રપિતા મહાત્મા ગાંધીને શ્રદ્ધાંજલિ પાઠવી હતી. સ્વાતિ માલીવાલે કહ્યું કે, દિલ્હી પોલીસ અમને ઉપવાસની મંજૂરી આપતી નથી તો પણ અમે અમારો ઉપવાસ ચાલુ જ રાખીશું. કારણ કે, આ મહિલાઓનો અધિકાર અને ન્યાયની લડાઇ છે. આ પહેલા મે બાળાઓની સાથે થઇ રહેલા દુષ્કર્મને લઇને 10 દિવસ ભૂખ હડતાલ કરી હતી. ત્યારબાદ કેન્દ્ર સરકારે એક કાયદો બનાવ્યો હતો પરંતુ તેને લાગુ કરવામાં આવ્યો ન હતો.

તે સિવાય સ્વાતિ માલીવાલે વિપક્ષના આરોપોને નકારતા કહ્યું કે, તે માત્ર અને માત્ર મહિલાઓના હકની લડાઇ લડી રહી છે અને લડાઇ ત્યાં સુધી ચાલુ રાખશે જ્યાં સુધી કાયદો લાગુ ન કરે. દેશમાં જે પણ મહિલાઓ વિરૂદ્ધ ગુના થઇ રહ્યાં છે તેના વિરૂદ્ધ કાયદો લાગુ કરવો જોઇએ અને આરોપીઓને 6 મહિનામાં જ ફાંસીની સજા આપવી જોઇએ.