કેદારનાથના કપાટ થયા બંધ, ઉત્તરાખંડના સીએમ ત્રિવેન્દ્રસિંહ અને યુપીના સીએમ યોગી આદિત્યનાથે કર્યા દર્શન

આજથી કેદારનાથ ધામના કપાટ શિયાળાની ઋતુ માટે બંધ કરવામાં આવ્યા છે. કપાટ બંધ થાય એ પહેલાં કેદારનાથ ધામમાં સોમવારે સવારે વિશેષ પૂજા કરવામાં આવી હતી. જે બાદ બાબાનો પંચમુખી રથ બરફવર્ષાની વચ્ચે સ્થળાંતર માટે રવાના થયો હતો. હવે શિયાળાની ગાદી એવા ઓમકારેશ્વર મંદિરમાં બાબા કેદારના દર્શન થઈ શકશે. કપાટ બંધ થતા પહેલાં ઉત્તર પ્રદેશના મુખ્યપ્રધાન યોગી આદિત્યનાથ અને ઉત્તરાખંડના મુખ્યપ્રધાન ત્રિવેન્દ્રસિંહ રાવતે સોમવારે સવારે 4 વાગ્યે બાબા કેદારનાથના દર્શન કર્યા હતા.

• કેદારનાથના કપાટ થયા બંધ
• ઉત્તરાખંડ અને યુપીના મુખ્યપ્રધાને કર્યા બાબા કેદારનાથના દર્શન
• સીએમ ત્રિવેન્દ્રસિંહ ભજન ગાતા જોવા મળ્યા
• બદ્રીનાથ જવાનો પણ બંને મુખ્યપ્રધાનનો કાર્યક્રમ

રુદ્રપ્રયાગ: ભગવાન શિવના જ્યોતિર્લિંગ પૈકીના એક બાબા કેદારનાથ મંદિરના કપાટ સોમવારે બંધ કરવામાં આવ્યા હતા. બાબા કેદારના ધામમાં ગત રાત્રીથી શરૂ થયેલી બરફવર્ષા સોમવાર સવાર સુધી ચાલુ રહી હતી. જેનાથી કેદારનાથ ધામનું વાતાવરણ વધુ રમણીય અને સુંદર બન્યું હતુ. ઉત્તર પ્રદેશના મુખ્યપ્રધાન યોગી આદિત્યનાથ અને ઉત્તરાખંડના મુખ્યપ્રધાન ત્રિવેન્દ્રસિંહ રાવતે પણ કેદારનાથ ધામના દર્શન કર્યા હતા.

યોગી આદિત્યનાથે બરફીલા વાતાવરણમાં ફોટાઓ પાડ્યા

યોગી આદિત્યનાથે હિમવર્ષામાં કેદારનાથ ભગવાનના દર્શન કર્યા હતા. તેમણે બરફીલા વાતાવરણમાં ફોટાઓ પાડવાનો આનંદ માણ્યો હતો. યોગી આદિત્યનાથ ઘણીવાર ગોરખનાથ ધામમાં ગાય અને વાછરડાને ઘાસચારો ખવડાવતા જોવા મળે છે. જોકે આ વખતે બરફવર્ષા દરમિયાન યોગીને કેદારનાથ જવાની તક મળી અને તેમણે ત્યાં બરફવર્ષના ફોટા પાડ્યા હતા. આ તકે યોગી આદિત્યનાથનું અલગ જ રૂપ જોવા મળ્યું હતું.

સીએમ ત્રિવેન્દ્રસિંહ ભજન ગાતા અને ઝૂમતા જોવા મળ્યા

રવિવારની રાત્રે સીએમ ત્રિવેન્દ્રસિંહ રાવત અને ઉત્તર પ્રદેશના સીએમ યોગી આદિત્યનાથે બાબા કેદારની મુલાકાત લીધી હતી. બંનેએ કેદારપુરીમાં પુનર્નિર્માણ કાર્યની સમીક્ષા પણ કરી હતી. સોમવારે સવારે 4 વાગ્યે બંને મુખ્યપ્રધાને ઠંડા વાતાવરણમાં બાબા કેદારનાથના દર્શન કર્યા હતા. જ્યારે સીએમ ત્રિવેન્દ્રસિંહ ભજન ગાતા અને ઝૂમતા જોવા મળ્યા હતા. બંને મુખ્યપ્રધાનો આજે સમાપન સમારોહમાં હાજરી આપશે.

બદ્રીનાથ જવા માટેનો પણ બંને મુખ્યપ્રધાનનો કાર્યક્રમ

કેદારનાથ બાદ બદ્રીનાથ જવા માટે સીએમ ત્રિવેન્દ્રસિંહ રાવત અને યુપીના સીએમ યોગી આદિત્યનાથનો પણ કાર્યક્રમ છે. ત્યાં ભગવાન બદ્રી-વિશાલના આશીર્વાદ લેવા ઉપરાંત, યોગી આદિત્યનાથ ઉત્તર પ્રદેશ સરકાર દ્વારા બનાવવામાં આવતા વિશ્રામ ગૃહના ભૂમિપૂજન કાર્યક્રમમાં સામેલ થશે.