છત્તીસગઢ ભાજપમાં ભૂકંપ, તમામ સાંસદોને પડતા મુકાય તેવી શક્યતા

ન્યૂઝ ડેસ્ક: ચૂંટણી પંચે લોકસભા ચૂંટણી માટે જ્યારથી તારીખોની જાહેરાત કરી છે ત્યારથી તમામ રાજ્યોમાં દરેક પાર્ટીનો પારો હાઈ લેવલે જોવા મળી રહ્યો છે, કારણ કે દરેક પળે અહીં નવા નવા ઉતાર ચડાવ આવી રહ્યા છે. આવું જ કંઈક છત્તીસગઢના રાજકારણમાં પણ થવાનું છે, ભાજપ અહીં એક એવો નિર્ણય લેવા જઈ રહ્યું જેને કારણે રાજકીય ભૂકંપ આવી શકે છે.

વાત જાણે એમ છે કે, આ વખતે ભાજપ છત્તીસગઢમાં તમામ ચાલું સાંસદોના પત્તા કાપે તેવી શક્યતાઓ છે. આપને જણાવી દઈએ કે, પાર્ટી આ વખતે પ્રદેશમાં લાંબા સમયથી સાંસદ રહેલા નેતા રમેશ બૈસને ટિકીટ નહીં આપે. તો એવું પણ જાણવા મળ્યું છે કે, આ વખતે રાજનાંદગાવમાંથી અભિષેક સિંહની જગ્યાએ તેમના પિતા રમણ સિંહને ટિકીટ આપવાની વાત થઈ રહી છે. આ વાત પરથી એટલું સ્પષ્ટ થઈ રહ્યું છે કે, પ્રદેશમાં હવે અભિષેકને રાખી પિતા રમણ સિંહને કેન્દ્રની રાજનીતિમાં લઈ જવા માંગે છે.

આ નિર્ણયથી શું ફરક પડશે

1 સાત વખતથી સતત જીતતા સાંસદો આ વખતે ટક્કરમાંથી બહાર થઈ જશે...જી હાં..છત્તીસગઢમાં જો ભાજપ તમામ સાંસદોના પત્તા કાપશે તો રાજકારણ મોટો ભૂકંપ આવી શકે છે. સતત સાત વખતથી જીતતા આવતા રમેશ બૈસે રાજધાની રાયપુરને ભાજપનો મજબૂત કિલ્લો બનાવી દીધો છે.તેઓ દરેક વખતે મોટી માર્જીન સાથે જીતતા આવે છે. ગ્રામિણ વિસ્તારોમાં મજબૂત પકડ ધરાવતા રમેશ બૈસ અટલ સરકારમાં મંત્રી રહી ચૂક્યા છે. તેમને આ વખતે પણ મજબૂત દાવેદાર માનવામાં આવતા હતા.પણ જાણવા મળ્યું છે તેમનું પણ નામ આ વખતે ભાજપકાપી શકે છે. જેને ચૂંટણી અગાઉ એક મહત્વનો ફેરફાર માનવામાં આવશે.

2. કહેવાય છે કે રમણ સિંહને પણ તેમના પુત્રની જગ્યાએ રાજનાંદગામ સીટ પરથી લડાવશે. ધરમલાલ કૌશિક બિલાસપુર અને બૃજમોહન અગ્રવાલ રાયપુરથી અને કોરબાથી નનકીરામ કંવરને મેદાનમાં ઉતારી શકે. પણ જો આ જ ફોર્મ્યુલા અપનાવે તો ભાજપને બસ્તર, કાંકેર અને દુર્ગમાં શસક્ત ઉમેદવાર મેળવવો લોઢાના ચણા ચાવવા બરાબર સાબિત થશે.

3. જો આ ફોર્મ્યુલા અપનાવે તો પાર્ટીને પ્રદેશમાં જાતીગત સમીકરણ સાધવામાં પણ મુશ્કેલી આવી શકે છે.

4. કોંગ્રેસ પાસે એવું કહેવાનો મોકો મળી જશે કે, ભાજપ સાંસદોએ પાંચ વર્ષમાં નિષ્ક્રિય રહી છે એટલા માટે જ તમામ સાંસદોને ઘરે બેસાડી દીધા છે.

5. આંતરિક ડખો થવાના પણ એંધાણ વર્તાઈ રહ્યા છે. એક સાથે તમામ સાંસદોના પત્તા કપાવાથી આંતરિક ઝઘડાઓ થવાની પૂરી સંભાવના છે. આ નેતાઓ ભલે પાર્ટીમાં કોઈ પણ જાતનો વિરોધ ન કરે અથવા તો પક્ષમાં કામ નહીં કરે, તો પણ ચૂંટણીમાં ભાજપને નુકસાન વેઠવું પડશે.