અમદાવાદ: ગુજરાત યુનિવર્સિટીમાં તા 28થી 30 જાન્યુઆરી દરમિયાન NAAC દ્વારા નિરીક્ષણ કામગીરી હાથ ધરવામાં આવી હતી, આ દરમિયાન NAAC ટીમના સભ્યોએ ગુજરાત યુનિવર્સિટી આવીને વિવિધ વિભાગોનું નિરીક્ષણ કર્યું હતું. જેમાં ગુજરાત યુનિવર્સિટીને મોટી સફળતા સાંપડી છે. NAAC ટીમ દ્વારા ગુજરાત યુનિવર્સિટીને A+ ગ્રેડ આપવામાં આવ્યો છે.
ગુજરાત યુનિવર્સિટીને A+ ગ્રેડ મળ્યો: ગુજરાત યુનિવર્સિટીના કુલપતિ નીરજા ગુપ્તાએ જણાવ્યું કે, A+ ગ્રેડ મેળવવા માટે ગુજરાત યુનિવર્સિટીના અધિકારીઓ અને કર્મચારીઓએ ઘણી મહેનત કરી છે. A+ ગ્રેડ મળવાથી વિદ્યાર્થીઓને ઘણો ફાયદો થશે. ઝીરોથી અમે તૈયારીઓ શરુ કરી હતી.NAAC ટીમના સભ્યોએ અમારી પાસેથી 5 વર્ષની વિગતો માંગી હતી. જે માટે અમે બધા જ માપદંડોની શરુઆતથી જ તૈયારીઓ રાખી હતી. જે માપદંડોમાં આગળ વધ્યા છીએ. વર્ષ 2015માં ગુજરાત યુનિવર્સિટીને B ગ્રેડ મળ્યો હતો. પરંતુ આ વખતે યુનિવર્સિટીના અધિકારીઓ, કર્મચારીઓ અને વિદ્યાર્થીઓના સહયોગથી 10 વર્ષ બાદ A+ ગ્રેડ મળ્યો છે.