અમદાવાદ: વર્ષ 2024ને સમાપ્ત થવાને હવે માત્ર થોડા દિવસો બાકી છે. ગુજરાતી ફિલ્મ ઈન્ડસ્ટ્રીની વાત કરીએ તો ઢોલિવૂડ માટે આ વર્ષ પ્રમાણમાં સારું રહ્યું છે અને આ વર્ષે રિલીઝ થનારી ઘણી ફિલ્મોએ કમાણીની સાથે સાથે દર્શકોના દિલો પર પણ સારી એવી છાપ છોડી છે. આ વર્ષે સૌથી વધુ કમાણી કરનાર 3 ગુજરાતી ફિલ્મોની વાત કરીએ તો તેમાં પ્રથમ નંબરે 'જમકુડી', બાદમાં 'ફક્ત પુરુષો માટે' અને ત્રીજા નંબરે 'કસુંબો' છે.
ઝમકુડી
હોરર કોમેડી ગુજરાતી ફિલ્મ ઝમકુડી દર્શકોને ખૂબ પસંદ આવી હતી. Sacnilk.com ના રિપોર્ટ મુજબ, જમકુડી આ વર્ષે સૌથી વધુ કમાણી કરનાર ગુજરાતી ફિલ્મ છે. ફિલ્મે 18.7 કરોડ રૂપિયાનું નેટ ગુજરાતી કલેક્શન કર્યું છે. જ્યારે વર્લ્ડ વાઈડ અને ઈન્ડિયા ગ્રોસમાં ફિલ્મની કમાણી 17.15 કરોડ રહી છે. ફિલ્મમાં ગુજરાતી ઈન્ફ્લુએન્સર વિરાજ ઘેલાણી, નેશનલ એવોર્ડ વિજેતા એક્ટ્રેસ માનસી પારેખ તથા સંજય ગોરડિયા, ઓરજ રાવલ જેવા કલાકારો છે. ફિલ્મને ઉંમગ વ્યાસ દ્વારા નિર્દેશિત કરવામાં આવી હતી.
ગુજરાતી ફિલ્મોએ 2024માં મચાવી ધમાલ (ETV Bharat GFX) 'ફક્ત પુરુષો માટે'
આ પછીના ક્રમે કમાણી મામલે 'ફક્ત પુરુષો માટે' ફિલ્મ રહી છે. આ ફિલ્મ 8.69 કરોડ રૂપિયાની ઈન્ડિયા ગુજરાત નેટ ગ્રોસ કમાણી કરી છે. જ્યારે વર્લ્ડ વાઈડ અને ઈન્ડિયા ગ્રોસમાં ફિલ્મની કમાણી 8.4 કરોડ રહી છે. ફિલ્મમાં બોલિવૂડના મેગા સ્ટાર અમિતાભ બચ્ચને એક્ટિંગ કરી છે, સાથે જાણીતા એક્ટર દર્શન ઝરીવાલા, યશ સોની, ઈશા કંસારા તથા મિત્ર ગઢવી પણ છે.
'કસુંબો'
આ ઉપરાંત કસુંબો આ વર્ષે સૌથી વધુ કમાણી કરનારી ત્રીજા નંબરની ફિલ્મ છે. કસુંબોએ ઈન્ડિયા ગુજરાતી નેટમાં કુલ 7.53 કરોડ રૂપિયાની કમાણી કરી છે. જ્યારે વર્લ્ડવાઈડ અને ઈન્ડિયા ગ્રોસમાં તેની કમાણી 9.55 કરોડ રૂપિયા રહી છે. ફિલ્મને રામમોરી, વિમલકુમાર ધામી અને વિજયગીરી બાવાએ લખી છે અને તેનું નિર્દેશન વિજયગીરી બાવાએ કર્યું છે. ફિલ્મની સ્ટાર કાસ્ટની વાત કરીએ તો ધર્મેન્દ્ર ગોહિલ, રૌનક કામદાર અને શ્રદ્ધા ડાંગર જેવા કલાકારોએ ફિલ્મમાં અભિનય કર્યો છે.
4થી 10 નંબરમાં કઈ ફિલ્મો રહી?
Sacnilk.comના રિપોર્ટ મુજબ,આ પછીના ક્રમે હાહાકાર 5.06 કરોડની કમાણી સાથે ચોથા નંબરે છે. પાંચમા નંબરે ઉડન છૂ 4.47 કરોડની કમાણી, છઠ્ઠા નંબરે ત્રિશા ઓન ધ રોક્સ 4.06 કરોડની કમાણી, સાતમા નંબરે લગ્ન સ્પેશ્યલ 2.71 કરોડની કમાણી, આઠમા નંબરે ઈટ્ટા કિટ્ટા 2.63 કરોડ, નવમા ક્રમે લોચા લાપસી 2.5 કરોડ અને 10મા ક્રમે સમંદર 2.07 કરોડની કમાણી સાથે છે.
ગુજરાતી ફિલ્મની હિન્દી રીમેક ઝળકી
આ ઉપરાંત વર્ષ 2023માં રિલીઝ થયેલી ગુજરાતી ફિલ્મ વશની હિન્દી રિમેક આ વર્ષે બની હતી. જેમાં ગુજરાતી એક્ટ્રેસ જાનકી બોડીવાલા, ઉપરાંત અજય દેવગણ, આર. માધવન અને એક્ટ્રેસ જ્યોથિકા જોવા મળ્યા હતા. આ ફિલ્મને પણ દેશભરમાં સારો એવો પ્રતિસાદ મળ્યો હતો અને ફિલ્મે વર્લ્ડવાઈડ 213 કરોડ રૂપિયાથી વધુની કમાણી કરી હતી. આમ 2024નું વર્ષ ગુજરાતી સિનેમા માટે સારું રહ્યું હતું.
આ પણ વાંચો:
- 'ડેન્જર લંકા'થી લઈને 'બબ્બર શેર' સુધી, 2024ના ટોચના 5 ખૂંખાર વિલનનું લિસ્ટ જુઓ
- પૂર્વ PM મનમોહન સિંહનું નિધન, સલમાન ખાનની 'સિકંદર'નું ટીઝર મોકૂફ, જાણો હવે ક્યારે રિલીઝ થશે
