નવી દિલ્હી: વડાપ્રધાન નરેન્દ્ર મોદીની આગેવાની હેઠળની કેબિનેટે ભારતમાં 'વન નેશન વન ઇલેક્શન'ના પ્રસ્તાવને મંજૂરી આપી દીધી છે. કેબિનેટે બુધવારે યોજાયેલી તેની બેઠકમાં દેશમાં એક સાથે ચૂંટણી કરાવવાના પ્રસ્તાવને મંજૂરી આપી હતી. મળતી માહિતી મુજબ, બપોરે 3 વાગ્યે મોદી કેબિનેટની બેઠકમાં લેવાયેલા નિર્ણયો અંગે માહિતી આપવામાં આવશે.
દરમિયાન કેન્દ્રીય મંત્રી અશ્વિની વૈષ્ણવે કેબિનેટ બેઠક પર પ્રતિક્રિયા આપી હતી. તેમણે કહ્યું કે કેન્દ્રીય કેબિનેટે 'એક રાષ્ટ્ર, એક ચૂંટણી' પર કોવિંદ પેનલના અહેવાલને સ્વીકારી લીધો છે. તેનાથી ચૂંટણી ખર્ચનો બોજ ઓછો થશે. કેન્દ્રીય મંત્રીએ કહ્યું કે કેબિનેટની બેઠકમાં વિનસ ઓર્બિટર મિશન, ગગનયાનના વિસ્તરણ અને ચંદ્રયાન-4 મિશનને પણ મંજૂરી આપવામાં આવી છે.
આ પહેલા મોદી સરકારના ત્રીજા કાર્યકાળના 100 દિવસ પૂરા થવા પર ગૃહમંત્રી અમિત શાહે પત્રકાર પરિષદને સંબોધિત કરતા કહ્યું હતું કે, આ મુદત પૂર્ણ થાય તે પહેલા જ દેશમાં 'એક રાષ્ટ્ર, એક ચૂંટણી' લાગુ કરવામાં આવશે.
તમને જણાવી દઈએ કે આ વર્ષની શરૂઆતમાં પૂર્વ રાષ્ટ્રપતિ રામ નાથ કોવિંદની અધ્યક્ષતામાં એક ઉચ્ચ સ્તરીય પેનલે લોકસભા અને રાજ્ય વિધાનસભા બંને માટે એકસાથે ચૂંટણી કરાવવાની ભલામણ કરી હતી. આ માટે, પેનલે 18 બંધારણીય સુધારાઓ પણ સૂચવ્યા, જેમાંથી મોટા ભાગનાને રાજ્યની વિધાનસભાની મંજૂરીની જરૂર નથી, પરંતુ બંધારણીય સુધારા બિલના રૂપમાં સંસદની મંજૂરીની જરૂર પડશે.
32 રાજકીય પક્ષોનું સમર્થન
પૂર્વ રાષ્ટ્રપતિ રામનાથ કોવિંદની આગેવાની હેઠળની સમિતિએ આ મુદ્દે 62 પક્ષોનો સંપર્ક કર્યો હતો. જેમાંથી 47 રાજકીય પક્ષોએ પોતાનો અભિપ્રાય આપ્યો હતો, જ્યારે 15 પક્ષોએ કોઈ પ્રતિક્રિયા આપી ન હતી. પ્રતિક્રિયા આપનાર 47 પક્ષોમાંથી 32 પક્ષોએ એક સાથે ચૂંટણી યોજવાના વિચારને સમર્થન આપ્યું હતું, જ્યારે 15 પક્ષોએ તેનો વિરોધ કર્યો હતો.
વન નેશન વન ઇલેક્શનના ફાયદા
દેશભરમાં એક સાથે ચૂંટણી થાય તો કરોડો રૂપિયાની બચત થશે. તેમજ ચૂંટણી પંચ વારંવાર ચૂંટણી કરાવવાથી બચી જશે. એક સાથે ચૂંટણી યોજવાથી ચૂંટણી નહીં પરંતુ વિકાસ પર ધ્યાન કેન્દ્રિત કરવામાં આવશે. ઉપરાંત, વારંવાર આચારસંહિતા લાગુ કરવાની જરૂર રહેશે નહીં. આનાથી કાળા નાણા પર અંકુશ લાવવામાં પણ મદદ મળશે.
રાજ્ય ચૂંટણી અધિકારીઓ સાથે પરામર્શ
પેનલે રાજ્ય ચૂંટણી સત્તાવાળાઓ સાથે પરામર્શ કરીને ભારતીય ચૂંટણી પંચ (ECI) દ્વારા સામાન્ય મતદાર યાદી અને મતદાર ઓળખ કાર્ડ તૈયાર કરવાની પણ ભલામણ કરી હતી. હાલમાં, ECI લોકસભા અને વિધાનસભાની ચૂંટણીઓ માટે જવાબદાર છે, જ્યારે નગરપાલિકાઓ અને પંચાયતોની સ્થાનિક સંસ્થાઓની ચૂંટણીઓનું સંચાલન રાજ્ય ચૂંટણી પંચ દ્વારા કરવામાં આવે છે.
- રાહુલ ગાંધી પર અપમાનજનક ટિપ્પણી કરવા બદલ રવનીત સિંહ બિટ્ટુ વિરુદ્ધ દિલ્હી હાઈકોર્ટમાં અરજી દાખલ - PIL Against Ravneet Singh Bittu
- આમ આદમી પાર્ટી દિલ્હીમાં કરી રહી છે મોટી રેલીનું આયોજન, અરવિંદ કેજરીવાલ જનતાને કરશે સંબોધન! - DELHI AAP PLANNING FOR BIG RALLY
