નવી દિલ્હી/વોશિંગ્ટન:ભારત અને કેનેડા વચ્ચે રાજદ્વારી વિવાદ નવા સ્તરે પહોંચી ગયો છે. ખાસ કરીને ખાલિસ્તાની આતંકવાદી હરદીપ સિંહ નિજ્જરની હત્યાને લઈને ભારત પર કેનેડાના નવા આરોપો બાદ બંને દેશો વચ્ચે તણાવ વધુ વધી ગયો છે. કેનેડાએ ભારતીય હાઈ કમિશનર અને અન્ય રાજદ્વારી અધિકારીઓ પર 'ગુનાહિત પ્રવૃત્તિઓ'માં સામેલ હોવાનો આરોપ લગાવ્યો છે.
આ પછી ભારતે કેનેડામાંથી પોતાના હાઈ કમિશનર અને અન્ય રાજદ્વારીઓને પાછા બોલાવવાનો નિર્ણય કર્યો. આ સાથે નવી દિલ્હીમાં હાજર છ વરિષ્ઠ કેનેડિયન રાજદ્વારીઓને હાંકી કાઢવામાં આવ્યા છે અને 19 ઓક્ટોબર સુધીમાં ભારત છોડવા માટે કહેવામાં આવ્યું છે.
ભારતની આ કાર્યવાહી બાદ કેનેડાએ પણ છ ભારતીય રાજદ્વારીઓને દેશનિકાલ કરવાનો આદેશ જારી કર્યો છે. કેનેડાએ ભારતીય રાજદ્વારીઓને લક્ષ્યાંકિત હત્યામાં સામેલ હોવાનો આરોપ મૂક્યો છે, અને દાવો કર્યો છે કે ભારતે તેની તપાસમાં સહકાર આપ્યો નથી.
તે જ સમયે, વોશિંગ્ટન પોસ્ટના એક અહેવાલમાં કેન્દ્રીય ગૃહ પ્રધાન અમિત શાહ પર કેનેડામાં ગુનાહિત ગતિવિધિઓમાં સામેલ હોવાનો આરોપ લગાવવામાં આવ્યો છે. અહેવાલ મુજબ, કેનેડિયન અધિકારીઓએ ભારત સરકારના વરિષ્ઠ વ્યક્તિઓ પર કેનેડામાં ખાલિસ્તાની આતંકવાદીઓ સામે હિંસાનું કાવતરું ઘડવાનો આરોપ મૂક્યો છે, જેમાં હરદીપ સિંહ નિજ્જરની હત્યા અને ખાલિસ્તાની તરફી તત્વો પર અન્ય હુમલાનો સમાવેશ થાય છે.
રિપોર્ટ અનુસાર, આ દાવા ઈન્ટરસેપ્ટેડ કોમ્યુનિકેશન્સ અને નવી એકત્રિત કરવામાં આવેલી ઈન્ટેલિજન્સ માહિતીના આધારે કરવામાં આવ્યા છે. રિપોર્ટમાં ગૃહમંત્રી અમિત શાહને પણ હુમલામાં સામેલ વરિષ્ઠ અધિકારીઓમાંના એક તરીકે વર્ણવવામાં આવ્યા છે. વોશિંગ્ટન પોસ્ટ અનુસાર, વધતા તણાવને ઓછો કરવા માટે કેનેડિયન અને ભારતીય અધિકારીઓ વચ્ચે સિંગાપોરમાં એક ગુપ્ત બેઠક યોજવામાં આવી હતી, પરંતુ ભારતે હુમલામાં કોઈપણ સંડોવણીનો ઇનકાર કર્યો હતો. વોશિંગ્ટન પોસ્ટે દાવો કર્યો હતો કે મીટિંગ દરમિયાન ભારતના રાષ્ટ્રીય સુરક્ષા સલાહકાર અજીત ડોભાલે ભારતીય રાજદ્વારીઓ દ્વારા દેખરેખની ગતિવિધિઓ સ્વીકારી હતી, પરંતુ હિંસા સાથે કોઈપણ જોડાણનો ઇનકાર કર્યો હતો.
રોયલ કેનેડિયન માઉન્ટેડ પોલીસનો દાવો
રોયલ કેનેડિયન માઉન્ટેડ પોલીસ (RCMP) એ કહ્યું કે, તેણે કેનેડાની ધરતી પર ભારત સરકારના એજન્ટો દ્વારા 'સંગઠિત' ગુનાહિત પ્રવૃત્તિઓની તપાસ કરવા ફેબ્રુઆરી 2024 માં ટીમની રચના કરી હતી. RCMP એ હત્યાઓ અને કેનેડામાં ભારતીય રાજદ્વારીઓ વચ્ચેની 'લિંક'નો પર્દાફાશ કરવાનો દાવો કર્યો છે.
RCMPએ દાવો કર્યો હતો કે, આ રાજદ્વારીઓ ગુપ્ત પ્રવૃત્તિઓમાં જોડાવા અને દક્ષિણ એશિયાના કેનેડિયનો પર ગુનાહિત પ્રોક્સીઓ દ્વારા નિશાન બનાવવા માટે ગુપ્ત માહિતી એકત્ર કરવા માટે તેમના સત્તાવાર હોદ્દાનો ઉપયોગ કરે છે.
આ પણ વાંચો:
- કેનેડા સામે ભારતે લીધા કડક પગલાં! 6 રાજદ્વારીઓની હકાલપટ્ટી, 19 ઓક્ટોબર સુધી ભારત છોડવા આદેશ
