ড্ৰাগছ মাফিয়াক গ্ৰেপ্তাৰ কৰা কাৰ্যক প্ৰশংসা ৰকিবুল হুছেইনৰ - নগাঁও ৰাজীৱ ভৱন
শনিবাৰে বিধায়ক ৰকিবুল হুছেইনসহ নগাঁও জিলা কংগ্ৰেছৰ এটা সজাতি দলে বঢ়মপুৰ, কন্দলি, শগুণবাহী, ভেৰভেৰী, কামপুৰ আদি অঞ্চলৰ কণ্টেইনমেণ্ট জ'নৰ আবাসীসকলৰ সৈতে মত বিনিময় কৰে ৷ লগতে কণ্টেইনমেণ্ট জ'নৰ আবাসীসকলক মাস্ক, চেনিটাইজাৰ, প্ৰয়োজনীয় ঔষধ পাতি বিতৰণ কৰে নগাঁও জিলা কংগ্ৰেছৰ দলটোৱে । সংবাদমেল সম্বোধন কৰি ৰকিবুল হুছেইনে মন্তব্য প্ৰকাশ কৰে যে, বিগত কেইদিনত তেওঁ জিলাখনৰ বিভিন্ন স্থানৰ চিকিৎসালয়সমূহ পৰিভ্রমণ কৰে আৰু বিভিন্নজনে চিকিৎসালয়সমূহত নিয়মীয়াকৈ চিকিৎসক উপস্থিত নথকাৰ অভিযোগ কৰিছে । সেয়ে তেওঁ স্বাস্থ্য বিভাগৰ লগতে চৰকাৰলৈ এইক্ষেত্ৰত গুৰুত্ব দিবলৈ আহ্বান জনায় । বিগত কেইদিনত নগাঁও জিলাত আৰক্ষীয়ে অভিযান চলাই কেইবাটাও কুখ্যাত ড্ৰাগছ মাফিয়াক গ্ৰেপ্তাৰ কৰাৰ লগতে বুজন পৰিমাণৰ নিষিদ্ধ ড্ৰাগছ জব্দ কৰা কাৰ্যত জিলা আৰক্ষী প্ৰশাসনক প্ৰশংসা কৰাৰ লগতে চৰকাৰক ধন্যবাদ জনায় । তেওঁ কয় যে, ড্ৰাগছ নিৰ্মূলৰ ক্ষেত্ৰত কংগ্ৰেছ চৰকাৰৰ দিনতো এনে অভিযান চলোৱা হৈছিল যদিও সফল হ’ব পৰা নাছিল । সংবাদমেলৰ অন্তত প্ৰাক্তন মন্ত্ৰী গৰাকীয়ে কৰ্তব্যৰত সাংবাদিকসকলৰ মাজতো মাস্ক, চেনিটাইজাৰ, ভিটামিন চিৰাপ, ভিটামিন টেবলেট আদি বিতৰণ কৰে ।