Independence Day: ধেমাজিৰ কাছাৰী ময়দানত প্ৰস্তুতি জিলা প্ৰশাসনৰ

মাজত আৰু কেইঘণ্টামান বাকী ৷ দেওবাৰে সমগ্ৰ দেশজুৰি উদযাপন কৰা হ’ব 75 সংখ্যক স্বাধীনতা দিৱস ৷ স্বাধীনতা দিৱস উপলক্ষে ধেমাজিৰ কাছাৰী ময়দানতো জিলা প্ৰশাসনে ব্যাপক প্ৰস্তুতি চলাইছে ৷ ক’ভিড পৰিস্থিতিৰ বাবে এইবাৰ মাত্ৰ আৰক্ষীৰ চাৰিটা দলেহে পেৰেডত অংশ ল’ব ৷ যাৰ বাবে তেওঁলোকে ইতিমধ্যে চলাইছে অনুশীলন । এই সময়চোৱাত যাতে জিলাখনত কোনোধৰণৰ কূটাঘাতমূলক কাৰ্য সংঘটিত হ’ব নোৱাৰে, তাৰ বাবে ব্যাপক কটকটীয়া নিৰাপত্তা ব্যৱস্থা গঢ়ি তুলিছে জিলা প্ৰশাসনে ৷ এইক্ষেত্ৰত ধেমাজি আৰক্ষীৰ উপ অধীক্ষক ৰশ্মিৰেখা শৰ্মাই অৱগত কৰা অনুসৰি, ধেমাজি জিলাৰ বহু কেইটা প্ৰৱেশ পথত আৰক্ষীৰ ২৪ ঘণ্টাই চলিছে অবিৰত তালাচী অভিযান ৷ ধেমাজি সদৰৰ প্ৰৱেশ পথত প্ৰতিখন দুচকীয়া-চাৰিচকীয়া বাহন ৰখাই তন্ন-তন্নকৈ তালাচী চলোৱা হৈছে ৷