ৰাস পূৰ্ণিমাত ওৰাং ৰাষ্ট্ৰীয় উদ্যানত পদাৰ্পণ কৃষ্ণৰ

কিছুদিনপূৰ্বে গোৱালপাৰাত সন্ত্ৰাসৰ সৃষ্টি কৰা লাডেনৰ এতিয়া নতুন নাম কৃষ্ণ ৷ এতিয়াৰে পৰা ঠিকনাও নতুন হ'ল কৃষ্ণৰ ৷ বিশেষজ্ঞৰ পৰামৰ্শমতে কৃষ্ণক প্ৰশিক্ষণ দিব বনবিভাগে ৷ বিশাল কনভয়ৰে ওৰাং ৰাষ্ট্ৰীয় উদ্যানলৈ অনা হ'ল কৃষ্ণক ৷

ওৰাং, 13 নৱেম্বৰ: ৰাস পূৰ্ণিমাত ওৰাং ৰাষ্ট্ৰীয় উদ্যানত পদাৰ্পণ কৃষ্ণৰ ৷ কৃষ্ণক প্ৰশিক্ষণ দিবলৈ সাজু হৈছে ওৰাং ৰাষ্ট্ৰীয় উদ্যান । এই কৃষ্ণ পিছে কোনো ভগৱান নহয় ৷ বিগত কিছুদিনপূৰ্বে গোৱালপাৰাত সন্ত্ৰাসৰ সৃষ্টি কৰা লাডেন নামৰ হাতীটোৰ এতিয়া নতুন নাম কৃষ্ণ ৷ নামৰ লগতে এতিয়াৰে পৰা ঠিকনাও নতুন হ'ল কৃষ্ণৰ । মঙলবাৰৰ নিশা ৰংজুলিৰ পৰা বিশাল কনভয়ৰে ওৰাং ৰাষ্ট্ৰীয় উদ্যানলৈ অনা হ'ল কৃষ্ণক । ইতিপূৰ্বে উদ্যানখনত বাহৰ পাতি থকা চিকিৎসকৰ দল এটাই হাতীটোৰ স্বাস্থ্যপৰীক্ষা সম্পন্ন কৰিছে । সম্প্ৰতি বনবিভাগৰ উচ্চপদস্থ বিষয়া তথা বিশেষজ্ঞৰ এটা দলে হাতীটোৰ শুশ্ৰূষাত ব্যস্ত হৈ পৰিছে । পি চি চি এফ-ৰ তত্বাৱধানত থকা কৃষ্ণক কিছুদিন জিৰণি দিয়াৰ পিছত বিশেষজ্ঞৰ পৰামৰ্শমতে প্ৰশিক্ষণ দিব বনবিভাগে । ইপিনে কৃষ্ণৰ ক্ষেত্ৰত কোনো সুৰুঙা ৰাখিব বিচৰা নাই ৰাষ্ট্ৰীয় উদ্যান কৰ্তৃপক্ষই । কৃষ্ণক ৰখা অঞ্চলটোত সাধাৰণ পৰ্যটক তথা সাংবাদিক প্ৰৱেশত বাধা আৰোপ কৰিছে বনবিভাগে । উদ্যানখনত বনবিভাগৰ ৩০/৪০ জনীয়া বৃহৎ দল এটাইও বাহৰ পাতি আছে ৷ কৃষ্ণৰ ওচৰত দুই-তিনিজন লোককহে থাকিবলৈ দিয়া হ'ব বুলি উদ্যান কৰ্তৃপক্ষৰ পৰা জানিব পৰা গৈছে ।

আনহাতে, কৃষ্ণক উদ্যানখনলৈ অনাৰ সময়ত মঙলবাৰে নিশা প্ৰতিবাদ সাব্যস্ত কৰিছিল ইয়াৰ দাঁতিকাষৰীয়া লোকসকলে । অৱশেষত বনবিভাগ আৰু আৰক্ষীৰ লোক প্ৰতিবাদস্থলীত উপস্থিত হৈ হাতীটো প্ৰশিক্ষণৰ বাবেহে অনা হৈছে বুলি নিশ্চিতি প্ৰদান কৰিছে ৷ লগতে হাতীটোৱে কোনো ক্ষতি কৰিব নোৱাৰে বুলি প্ৰতিশ্ৰুতি দিয়াতহে প্ৰতিবাদ প্ৰত্যাহাৰ কৰে লোকসকলে । ইফালে হাতীটো ওৰাং ৰাষ্ট্ৰীয় উদ্যানলৈ অনা কাৰ্যক আদৰণিও জনাইছে একাংশ লোকে । উল্লেখ্য যে, কৃষ্ণৰ আগমনৰ লগে লগে উদ্যানখনত পোহনীয়া হাতীৰ সংখ্যা ৩৩ টালৈ বৃদ্ধি পালে । প্ৰশিক্ষণৰ অন্তত কৃষ্ণক অন্য পোহনীয়া হাতীৰ দৰে উদ্যানখনত নিয়োজিত কৰা হ'ব বুলি বনবিভাগে জানিবলৈ দিছে ।

লগতে চাওক:ওদালগুৰিত দুটাকৈ বন্যহস্তীৰ মৃত্যু