বিজেপিৰ নৱ নিযুক্ত ৰাজ্যিক সম্পাদক তৰংগ গগৈক সম্বৰ্ধনা

দিঘলীয়া গাওঁ পঞ্চায়তৰ অন্তৰ্গত ১০ টা ৱাৰ্ডৰ প্ৰায় ছয় শতাধিক ভোটাৰে বিজেপি নেতা তৰংগ গগৈৰ নেতৃত্বত আনুষ্ঠানিক ভাৱে বিজেপি দলত যোগদান কৰি গেৰুৱা দলটোৰ ভেটি শক্তিশালী কৰে।

নাহৰকটীয়া,20 আগষ্টঃ বুধবাৰে নাহৰকটীয়াৰ দিঘলীয়া গাঁও পঞ্চায়তৰ বিজেপি যুৱ মৰ্চাৰ উদ্যোগত নৱ নিযুক্ত অসম ৰাজ্যিক বিজেপিৰ সম্পাদক তৰংগ গগৈক সম্বৰ্ধনা জনোৱাৰ উদ্দেশ্যেৰে এখন ৰাজহুৱা সভা অনুষ্ঠিত হয়। নাহৰকটীয়া মণ্ডল বিজেপিৰ সভাপতি গকুল বৰাৰ সভাপতিত্বত অনুষ্ঠিত এই সম্বৰ্ধনা সভাখনত বিজেপিৰ ডিব্ৰুগড় জিলাৰ কাৰ্যনিৰ্বাহক সদস্য অমূল্য চেংলাৰী, বিজেপি মহিলা পৰিষদ ডিব্ৰুগড় জিলা সমিতিৰ সাধাৰণ সম্পাদিকা গৌৰী বৰা, বিজেপি যুৱ মৰ্চা নাহৰকটীয়া মণ্ডলৰ সাধাৰণ সম্পাদক জেমচ্ গগৈকে প্ৰমুখ্যে কৰি বহুকেইজন বিজেপিৰ দলীয় কৰ্মীৰ লগতে প্ৰায় আঠ শতাধিক সাধাৰণ ৰাইজ উপস্থিত থাকে।

উক্ত সভাতে দলীয় কৰ্মীৰ লগতেই বহু সাধাৰণ ৰাইজে তৰংগ গগৈক ফুলাম গামোচাৰে সম্বৰ্ধনা জনোৱাৰ লগতে দিঘলীয়া গাওঁ পঞ্চায়তৰ অন্তৰ্গত ১০ টা ৱাৰ্ডৰ প্ৰায় ছয় শতাধিক ভোটাৰে আনুষ্ঠানিকভাৱে বিজেপি দলত যোগদান কৰি গেৰুৱা দলটোৰ ভেটি শক্তিশালী কৰে। নৱ নিযুক্ত বিজেপি ৰাজ্যিক সম্পাদক তৰংগ গগৈয়ে কয়,"কেৱল মাত্ৰ দিঘলীয়া গাঁও পঞ্চায়তৰ এখন সভাতেই ৬০০ ভোটাৰে বিজেপিত যোগদান কৰা কাৰ্যই প্ৰমাণ কৰে যে নাহৰকটীয়া সমষ্টিত আৰু ২০-২৫ হাজাৰ লোকে বিজেপিলৈ গমন কৰিবলৈ সাজু হৈ আছে।"

লগতে পঢ়কঃজাতীয়তাবাদী ৰাজনৈতিক দল: আছু, যুৱছাত্ৰ পৰিষদে ঘোষণা কৰিলে উপদেষ্টা কমিটী