তিনিচুকীয়া, ২০ জুন : তিনিচুকীয়াৰ ২ নং কদমনি নামঘৰৰ সাহাযাৰ্থে আয়োজন কৰা উপহাৰ কুপনৰ খেলখনক বাধা দিছিল আৰক্ষী তথা প্ৰশাসনে ৷ আৰক্ষীৰ বাধাৰ পাচতো কোনো অজ্ঞাত স্থানত দেওবাৰে এখন ফলাফলৰ তালিকা প্ৰস্তুত কৰি আয়োজক সমিতিয়ে সামাজিক মাধ্যমত ৰাজহুৱা কৰে বুলি জানিব পৰা গৈছে ৷ তাৰ পাচতে তিনিচুকীয়াৰ লগতে কাষৰীয়া জিলাসমূহত সৃষ্টি হয় তীব্ৰ চাঞ্চল্যৰ ৷
ইফালে ২ নং কদমনি নামঘৰৰ আইমাতৃসকলৰ লগতে স্থানীয় লোকেও এই খেলৰ সবিশেষ কোনো সন্ধান নোপোৱাৰ অভিযোগ উত্থাপিত হৈছে ৷ ৰাইজে অভিযোগ কৰে যে খেলখনৰ ফলাফলৰ তালিকাত দিয়া নম্বৰসমূহৰ গৰাকী ওলোৱা নাই কোনো এজন গ্ৰাহক ৷ এয়া বিক্ৰী নোহোৱা টিকটৰ নম্বৰত সম্পূৰ্ণ পৰিকল্পিতভাৱে প্ৰস্তুত কৰা তালিকা বুলি সৰ্বত্ৰে এতিয়া চৰ্চিত হৈ পৰিছে ৷
তাৰ পাচতে দেওবাৰৰ পৰা তিনিচুকীয়াৰ আৰক্ষী অধীক্ষক অভিজিৎ গৌৰৱ দিলিপৰ নিৰ্দেশত আয়োজক সমিতিৰ বিৰুদ্ধে তিনিচুকীয়া আৰক্ষীয়ে চলায় অভিযান ৷ উপহাৰ কুপন খেলখনৰ মাষ্টাৰমাইণ্ড শিৱসাগৰৰ ভাস্কৰ নাথৰ লগতে লাইপুলি, কদমনিৰ আয়োজক সমিতিৰ মূল ব্যক্তি হৃদয় কুৰ্মী, নীলপৱন চেতিয়াকে আদি কৰি বাকীসকলৰ বিৰুদ্ধে তিনিচুকীয়া আৰক্ষীয়ে তীব্ৰ অভিযানৰ সমান্তৰালভাৱে অনুসন্ধান চলাই আছে যদিও পলাতক সকলো ৷