ৰঙাপৰা, 5 চেপ্টেম্বৰ: শোণিতপুৰত আজিও বন্ধ হৈ আছে সাপ্তাহিক বজাৰ সমূহ । সাপ্তাহিক বজাৰ সমূহত এতিয়া বিৰাজ কৰিছে নিমাওমাও পৰিৱেশে । দীৰ্ঘদিন ধৰি বজাৰ সমূহ বন্ধ হৈ থকাৰ পৰিপ্ৰেক্ষিতত গ্ৰাম্যঞ্চলৰ অৰ্থনৈতিক ভেটি বিধ্বস্ত হৈ পৰিছে । শোণিতপুৰত থকা সাপ্তাহিক বজাৰ খোলাৰ বাবে চৰকাৰৰ ওচৰত দাবী জনাইছে ৰঙাপৰাৰ বজাৰ ব্যৱসায়ী সন্থাই । ৰঙাপৰাৰ সমীপৱৰ্তী খেলমাটি সাপ্তাহিক বজাৰত ব্যৱসায়ী আৰু চাফাই কৰ্মীসকলে হাতে হাতে ফেষ্টুন লৈ চৰকাৰক বজাৰ খোলাৰ বাবে দাবী উত্থাপন কৰিছে । বন্ধ হৈ থকা সাপ্তাহিক বজাৰত ব্যৱসায়ৰ জৰিয়তে ক্ষুদ্ৰ ব্যৱসায়ীসকলে আজি জীৱন জীৱিকা চলোৱাৰ ক্ষেত্ৰত হাহাকাৰ কৰিবলগীয়া হৈছে । বিগত পাঁচমাহে গ্ৰাম্য অঞ্চলত চলি থকা সাপ্তাহিক বজাৰ সমূহ আজিকোপতি বন্ধ হৈ থকাত বহু ক্ষুদ্ৰ ব্যৱসায়ীৰ জীৱনলৈ চৰম ভাবুকি কঢ়িয়াই আনিছে ।
ইফালে, সাপ্তাহিক বজাৰ সমূহ বন্ধ হৈ থকাত বজাৰ গৃহ সমূহ ভাঙি জৰাজীৰ্ণ হোৱাৰ লগতে হাবি জংঘলৰে আগুৰি ধৰিছে । মৰিশালিৰ দৰে পৰিৱেশে বিৰাজ কৰিছে বজাৰস্থলীত।