নিউজ ডেস্ক, 20 এপ্ৰিল :বিহু অসমীয়া প্ৰাণ ৷ অসমৰ আকাশ বতাহত এতিয়া ৰঙালীৰ সুবাস (Rangali bihu celebration across Assam) ৷ ৰাজ্যৰ বিভিন্ন প্ৰান্তত দিনে নিশাই চলিছে বিহু অনুষ্ঠান, বিহু কৰ্মশালা, মুকলি বিহু প্ৰতিযোগিতা আৰু ক’ত যে কি !
শোণিতপুৰ জিলাৰ ৰঙাপৰাৰ ৰেলৱে’ খেল পথাৰত অনুষ্ঠিত হয় মুকলি বিহু প্ৰতিযোগিতা (Rangali bihu 2022) ৷ উল্লেখ্য যে প্ৰতি বছৰৰ দৰে এইবেলিও ৰঙাপৰা আঞ্চলিক ছাত্ৰ সন্থাই ঐতিহ্যমণ্ডিত ৰেলৱে খেল পথাৰত বিভিন্ন কাৰ্যসূচীৰে ৩৮ তম্ মুকলি বিহু প্ৰতিযোগিতা অনুষ্ঠিত কৰে ৷ প্ৰতিযোগিতাখনিত জিলাখনৰ লগতে অন্য জিলাৰ পৰা অহা বিহুৱা দলসমূহে অংশ গ্ৰহণ কৰে ৷
ঢোল-পেঁপাৰ শব্দত ৰজনজনাই উঠে বিহুতলীৰ বাকৰি । প্ৰতিযোগিতাত প্ৰথমস্থান লাভ কৰে গহপুৰৰ নৱ পাৰিজাত বিহুৱা দলে, দ্বিতীয়স্থান লাভ কৰে কলিয়াবৰৰ ফ্ৰেণ্ডশ্বিপ ক্লাৱ বিহুৱা দলে আৰু তৃতীয়স্থান লাভ কৰে তেজপুৰৰ অগ্নিশিখা বিহুৱা দলে ৷
বাপতি সাহোন ব’হাগৰ বিহুটি এতিয়াও ঠায়ে ঠায়ে পৰম্পৰা অনুসৰি সাত দিনীয়াকৈ অনুষ্ঠিত কৰা হয় (Saat bihu name) ৷ ব’হাগৰ প্ৰথম তাৰিখৰ পৰা সাত তাৰিখলৈকে বিহু অনুষ্ঠিত কৰাৰ পুৰণি পৰম্পৰা এতিয়াও চহা অসমীয়াই ধৰি ৰাখিছে ৷ মাজুলী অভয়পুৰীয়া গাঁৱত গাঁৱৰ সকলো বোৱাৰী-জীয়ৰী একেলগ হৈ বহাগৰ পঞ্চমটো দিনত উদযাপন কৰিলে জেং বিহু ৷ এই জেং বিহুক গাভৰু বিহু অথবা জীয়ৰী বিহু বুলিও জনা যায় ৷
ৰঙালী বিহু উপলক্ষে পোন প্ৰথম বাৰৰ বাবে বিলাসীপাৰাৰ পুৰাণ লাউপাৰাত অনুষ্ঠিত কৰা হ’ল মুকলি বিহু (Mukoli bihu competition on Bohag bihu) । পুৰাণ লাউপাৰা আঠিয়াবাৰী ৰঙালী বিহু উদযাপন সমিতিৰ উদ্যোগত অনুষ্ঠিত মুকলি বিহু অনুষ্ঠানত লাউপাৰা অঞ্চলৰ কণ কণ ছাত্ৰী, গাভৰু, যুৱতী আৰু বোৱাৰী সকলে একেলগে মাৰিলে জেং বিহু ৷ পোন প্ৰথম বাৰৰ বাবে পুৰাণ লাউপাৰাত অনুষ্ঠিত মুকলি বিহু অনুষ্ঠানত অংশ গ্ৰহণ কৰি উৎফুল্লিত হৈছে পৰে নাচনী সকল তথা গাওঁৰ ৰাইজ ।