ৰঙাপৰাত নিৰ্মাণৰ পাঁচ মাহ পাচতে খহিল গড়কাপ্তানি পথ

পুনৰ পথ নিৰ্মাণৰ দাবী স্থানীয় ৰাইজৰ

তেজপুৰ , ৭ মাৰ্চ: ৰাজ্য চৰকাৰে ৰাজ্যৰ গড়কাপ্তানী পথসমূহ উন্নয়ন কৰি যাতায়ত ব্যৱস্থা সুচল কৰি তুলিছে যদিও একাংশ পথৰ নিৰ্মাণ কাৰ্য নিম্নমানৰ হোৱাৰ পাচতেই খহি পৰিছে এইসমূহ পথ । শোণিতপুৰ জিলাৰ ৰঙাপৰাত ভাৰত চৰকাৰ পৰিকল্পনা আঁচনি মন্ত্ৰালয়ৰ দ্বাৰা অনুমোদিত প্ৰধান মন্ত্ৰী গ্ৰাম চড়ক যোজনাৰ অধীনত বিগত ২০১৭ বৰ্ষৰ ১০ অক্টোবৰত ৰঙাপৰা সমষ্টিৰ অন্তৰ্গত ধোকবস্তি পৰা ফুলগুৰি গড়কাপ্তানি পথটি নিৰ্মাণৰ শুভাৰম্ভ হৈছিল । গড়কাপ্তানি বিভাগৰ বিশ্বনাথ চাৰিআলি ৰাজ্যিক পথ সংমণ্ডলৰ অধীনত ১.২৭৭ কিলোমিটাৰ দৈঘ্যৰ পথচোৱা ৭৪ লাখ ৯৩ হাজাৰ ব্যয় সাপেক্ষে নিৰ্মাণ হৈছিল ।

আৰু এই পথচোৱাৰ নিৰ্মাণৰ কাম ২০১৮ ৰ ১১ অক্টোবৰত সমাপ্ত হয় যদিও নিৰ্মাণৰ কিছু দিনৰ পাচতে জহি খহি যায় পথটি । ইপিনে পথচোৱাৰ ঠিকা লাভ কৰা ঠিকাদাৰ গৰাকীয়ে অতি নিম্নমানৰ সামগ্ৰীৰে কাম সমাপ্ত কৰাৰ অভিযোগ উত্থাপন কৰিছে স্থানীয় ৰাইজে । সেয়ে স্থানীয় ৰাইজে ঠায়ে ঠায়ে বিধ্বস্ত হোৱা পথচোৱা মেৰামতি কৰিবলৈ বিভাগ তথা ঠিকাদাৰক দাবী জনাইছে ।