স্পৰ্টছ ডেস্ক, 12 অক্টোবৰঃ ৰাছিয়াত অনুষ্ঠিত হোৱা বিশ্ব মহিলা বক্সিং চেম্পিয়নশ্বিপৰ ছেমিফাইনেলত পৰাস্ত শোণিতপুৰৰ জিলাৰ ঢেকিয়াজুলিৰ প্ৰতিভাৱান খেলুৱৈ যমুনা বড়ো ৷ এক সংগ্ৰামী জীৱন অতিবাহিত কৰি বিশ্ব দৰৱাৰত উজলিবলৈ সক্ষম হোৱা যমুনাই চাইনিছ তাইপাই খেলুৱৈৰ হাতত পৰাজয়বৰণ কৰিবলগীয়া হয় ৷
অৱশ্যে বিশ্ব মহিলা বক্সিং চেম্পিয়নশ্বিপৰ নিজৰ অভিষেক মেচতেই ব্ৰঞ্জৰ পদক লাভ কৰি সন্তুষ্ট থাকিবলগীয়া হয় খেলুৱৈগৰাকী ৷ ভাৰতীয় সময় অনুসৰি বিয়লি 4 বজাত অনুষ্ঠিত হৈছিল যমুনাৰ মেচখন ৷ পুৱাতে যমুনাৰ সফলতাৰ বাবে মন্দিৰত পূজা-অৰ্চনা কৰা দেখা পোৱা গৈছিল যমুনাৰ মাতৃ নিৰ্মলী বড়োক ৷
অতি দৰিদ্ৰ পৰিয়ালৰ যমুনা বড়োৰ মাতৃয়ে এসময়ত শাক-পাচলি বিক্ৰী কৰি জীৱন অতিবাহিত কৰিছিল ৷ বৃহস্পতিবাৰে 54 কিলোগ্ৰাম শাখাত জাৰ্মানীৰ উৰচোলা গোটল’ব 4-1 ব্যৱধানত পৰাস্ত কৰি ছেমিফাইনেলত প্ৰৱেশ কৰিবলৈ সক্ষম হৈছিল যমুনাই ৷